हामी सबैकाे संसारन्यूज

काठमाडौं । लद्दाखमा तनाव अन्त्य गर्न भारत र चीनबीच सैन्य कमाण्डर तहको १५ औं चरणको वार्ता शुक्रबारदेखि सुरु भएको छ । दुवै देशका सैन्य कमाण्डरहरूबीच एलएसी नजिकैको भारतीय क्षेत्र चुशुलमा वार्ता चल्दैछ ।

लद्दाखमा पछिल्लो २२ महिनादेखि संघर्ष जारी छ। यस क्षेत्रमा दुवै देशका ५० देखि ६० हजार सेना तैनाथ छन् । करिब दुई महिनापछि भारत र चीनबीच उच्चस्तरीय सैन्य वार्ता भएको हो। यसअघिको वार्ताले खासै नतिजा निकाल्न सकेको थिएन ।

पूर्वी लद्दाखका केही क्षेत्रलाई लिएर दुई देशबीच मतभेद छ। छलफलको मुख्य विषय हट स्प्रिङ्स पोइन्ट (पट्रोलिङ प्वाइन्ट–१५)बाट सेना फिर्ता गर्ने रोकिएको प्रक्रिया पूरा गर्ने तर्फ उन्मुख हुने भारतीय सञ्चार माध्यमले जनाएका छन्।

वार्तामा सहभागी भारतीय प्रतिनिधिमण्डलको नेतृत्व लेहस्थित सेनाको १४औं कोरका नवनियुक्त कमाण्डर लेफ्टिनेन्ट जनरल अनिन्द्य सेनगुप्ताले गरेका छन् । भारतीय पक्षले देप्साङ बुल्गे र डेमचोक क्षेत्रलगायत तनावग्रस्त क्षेत्रबाट सेना फिर्ता गर्न जोड दिने अपेक्षा गरिएको छ ।

यसअघि जनवरी १२ मा १४ औं चरणको वार्ता भएको थियो । १४ औं चरणको वार्तामा बाँकी क्षेत्रबाट सेना फिर्ता गर्ने विषयमा कुनै महत्वपूर्ण सहमति हुन सकेको थिएन । वार्तापछि भारत–चीनले संयुक्त विज्ञप्ति जारी गर्दै दुवै पक्षले सैन्य र कूटनीतिक माध्यमबाट घनिष्ट सम्पर्कमा रहने र वार्तालाई निरन्तरता दिने बताएको थियो ।

भारत र चीनका सेनाहरू बीच पूर्वी लद्दाख सीमा विवाद ५ मई २०२० पाङ्गोङ ताल क्षेत्रमा हिंसात्मक झडप पछि सुरु भयो। त्यसपछि दुवै पक्षले हजारौं सैनिक र भारी हतियारको साथ विस्तारै आफ्नो तैनाथी बढाएका थिए । धेरै चरणको सैन्य र कूटनीतिक वार्तापछि दुवै पक्षले गत वर्ष सेना फिर्ता गर्न थालेका थिए। अहिले पाङ्गोङ ताल र गोग्रा क्षेत्रको उत्तर र दक्षिण किनारबाट सेना फिर्ता भएको छ ।