हामी सबैकाे संसारन्यूज

काठमाडौं । रुस-युक्रेनबीचको युद्ध तेस्रो हप्ता पनि जारी छ। रुसले आज आफ्नो आक्रमणलाई तीव्र पारेको छ र युक्रेनका धेरै शहरहरूमा घातक बम विष्फोट गरिरहेको छ।

रुसी सेना अहिले तीव्र गतिमा कीभतर्फ अघि बढिरहेको अन्तराष्ट्रिय सञ्चार माध्यमले जनाएका छन् ।

यसैबीच, रुसले पश्चिमी युक्रेनी सहर इभानो-फ्रान्किभस्क र लुत्स्कलगायतका विमानस्थल नजिकै आज श्रृंखलाबद्ध बम विस्फोट गराएको समाचार एजेन्सी एफबीले जनाएको छ । समाचार एजेन्सीका अनुसार बिहानैदेखि रुसले विमानस्थल केन्द्रीत आक्रमण गरेको हो ।

अर्कोतर्फ, रुसले शुक्रबार युक्रेनबाट रुससम्म दैनिक मानवीय करिडोर खोल्ने घोषणा गरेको छ । रुसको रक्षा मन्त्रालयका अनुसार अब हरेक दिन बिहान १० बजेसम्म युक्रेनबाट रुस सेक्योर करिडोरबाट मानिसहरु जान पाउनेछन् ।

रुससँगको व्यापारसम्बन्ध अन्त्य गर्ने घोषणा

अमेरिकी राष्ट्रपति जो बाइडेनले रुससँगको व्यापार सम्बन्ध अन्त्य गर्ने घोषणा गरेका छन् । अमेरिकाले युरोपियन युनियन र जी–७ देशमा आबद्ध भएर रुससँगको व्यापारमा मोस्ट फेवर्ड नेशनको हैसियत पनि फिर्ता लिनेछ ।

युक्रेनमा रुसी आक्रमणका कारण बाइडेनले आयातमा कर बढाउन सक्नेछन् । यो कदम संयुक्त राज्य अमेरिका र उसका सहयोगीहरूले पुटिनलाई युद्ध अन्त्य गर्न दबाब दिने प्रयास हो।