हामी सबैकाे संसारन्यूज

उत्तम विचार, काठमाडौं

मागेन देशले केही दियो मात्र सधैँभरि
चुस्यौँ टन्न जुकालेझैँ नहुँदा पेटमा हरि ।
के दिएँ राष्ट्रलाई खै गर्नुपर्ने छ प्रश्न यो ?
आफ्नै तस्बिर ऐनामा नहेरी नहुने भयो ।।१।

हिलो छ्यापेर के गर्नु गालीगलौज व्यर्थ छ
माथि फर्केर हावामा थुक्नुको न त अर्थ छ ।
सकिन्छ दोष थोपर्न असाध्य सजिलो छ यो
आफ्नै तस्बिर ऐनामा नहेरी नहुने भयो ।।२।

जाली फटाह अर्को भो आफू साधु भनाइयो
खोल ओढेर ब्वाँसोको राष्ट्र सेवी जनाइयो ।
अडिन्न दूध डोकामा अन्ततः चुहिँदै गयो
आफ्नै तस्बिर ऐनामा नहेरी नहुने भयो ।।३।

अर्कालाई भनी चोर खोज्दछौँ बहकाउन
चार अङ्गुल फर्किन्छन् आफैँतिर भुल्यौँ किन ?
पानी माथि छु ओभानो भन्नुको अर्थ के रह्यो
आफ्नै तस्बिर ऐनामा नहेरी नहुने भयो ।।४।

बाटो बिराउँछन् मान्छे के गरोस् यो समाजले
मूर्खको ओखती छैन ज्ञानी झुक्दछ लाजले ।
गधा भएछु गाईको स्वभाव छैनझैँ अहो !
आफ्नै तस्बिर ऐनामा नहेरी नहुने भयो ।।५।

छन्द : अनुष्टुप