हामी सबैकाे संसारन्यूज

काठमाडौं । चर्चित भारतीय कलाकार सलमान खान नेपाल आउने भएका छन् । सलमान जेठ १४ मा दशरथ रंगशालामा हुने ‘दबंग टुर रिलोडेड’का लागि नेपाल आउन लागेका हुन् ।

ओडीसी इन्टरटेन्मेन्ट र हिता ग्रुपको संयुक्त आयोजनामा हुन लागेको उक्त कार्यक्रममा सलमानसँगै अन्य भारतीय कलाकारहरु सोनाक्षी सिन्हा, प्रभु देवा, ज्याक्लिन फर्नानडिज, मनिष पल, गुरु रन्धावा, आयुष शर्मालगायत टिम नेपाल आउन लागेका हुन् ।

सलमान खान नेपाल भ्रमणमा आउने भएपछि संस्कृति, पर्यटन तथा नागरिक उड्यनमन्त्री प्रेमबहादुर आलेले उनलाई नेपालको हिमाली सुन्दरताको मनोरञ्जन लिन माउन्टेन फ्लाइटका लागि निम्तो समेत दिइसकेका छन् ।

मन्त्री आलेले आयोजित एक पत्रकार सम्मेललनमा सलमानसँग भिडियोवार्ता गर्दै माउन्टेन फ्लाइटको निम्तो दिएका हुन् । उनले लाइभ कार्यक्रममा सलमान खानलाई माउन्टेन फ्लाइट गराउने भन्दै त्यसका लागि समय दिन समेत आग्रह गरेका थिए । उनको आग्रहलाई सलमान खानले स्वीकार गर्दै समय मिलाउने बताएका थिए ।

आयोजक ओडीसी प्रमुख सिमान्त गुरुङका अनुसार सलमानले समय दिएमा ‘माउण्टेन फ्लाइट’मार्फत सगरमाथा अवलोकन गराउने तयारी पनि आयोजकको छ । ‘हाम्रो इभेन्ट २८ तारिखमा छ । उहाँको नेपाल बसाई तीन दिन रहनेछ । २७ तारिखमा बिहान नेपाल आउनुहुन्छ । २९ तारिखमा फर्किनुहुन्छ । यदि उहाँ २६ तारिखमा आउनु भयो भने ‘माउण्टेन फ्लाइट को योजना पनि छ । यदि २७ मा मात्रै आउनु भयो भने लुम्बिनी भ्रमण र एकदिन प्रायोजकहरुसँग ‘मिट एन्ड ग्रिट’ को कार्यक्रम छ,” ओडिसी प्रमुख गुरुङले बताए ।

उक्त कार्यक्रममा प्रवेशका लागि दर्शकहरुले नर्मल ५ हजार, सिल्भर १० हजार, गोल्ड टिकट १५ हजार र प्लेटिनम टिकट २५ हजार रूपैयाँ तिर्नुपर्नेछ ।
आयोजकले छिट्ट नै डिजिटल वालेटमार्फत टिधकट बिक्री खुला गरिने जानकारी दिएको छ ।

उक्त तीनदिने कार्यक्रमका लागि सलमानले आयोजकबाट ३ करोड भारतीय रुपैयाँ पारिश्रमिक लिने पनि बताइएको छ । सलमान लगायत उनको टिमलाई सोल्टी होटलमा बस्ने व्यवस्था मिलाइएको पनि आयोजकले जनाएका छन् ।