हामी सबैकाे संसारन्यूज

काठमाडौं । नेकपा एमालेका उपाध्यक्ष विष्णु पौडेलले अर्थमन्त्री जनार्दन शर्माले राष्ट्र बैंकको स्वायत्ततामाथि हस्तक्षेप गरेको बताएका छन् ।

देशको आर्थिक अवस्थाका बारेमा पार्टीको धारणा सार्वजनिक गर्न आयोजित पत्रकार सम्मेलनमा पूर्वअर्थमन्त्री समेत रहेका पौडेलले सो कुरा बताएका हुन् ।

उनले अर्थमन्त्री शर्माले राष्ट्र बैंकलाई आफ्नो अधिन अंगको रुपमा व्यवहार गरेको र गर्भनरलाई सचिव र सहसचिव झै चलाउन खोजेर राष्ट्र बैंकमाथि हस्तक्षेप गरेको आरोप समेत पौडेलले लगाएका छन् ।

‘राष्ट्र बैंकलाई मन्त्रालयको अधिनको रुपमा मन्त्रीले आफ्नो मन्त्रालयको मातहतका सचिव र सहसचिवलाई जसरी चलाउँछन् त्यहि ढंगले चलाउन खोजियो र राष्ट्र बैंकको स्वतन्त्रतामाथि हस्तक्षेप गरियो,’ सम्मेलनमा उपाध्यक्ष पौडेलले भने, ‘यस्तो स्थिति समेत सिर्जना भयो कि, मौद्रिक नीति ल्याउन राष्ट्र बैंकलाई रोक लगाउने वा समयमै मौद्रिक नीति ल्यान नदिने र आवस्यकता अनुसार परिमार्जन गर्न नदिने गरी हस्तक्षेप गर्यो ।’

पौडेलले यतिबेला अत्यन्तै नकरात्मक दिशातर्फ मलुक अगाडि बढिरहेको भन्दै केपी ओली नेतृत्वको सरकारले सात प्रतिशतको हाराहारीमा आर्थिक वृद्दि आर्जन गर्न सकेको बताउँदै कोभिड नियन्त्रण र जनजीवन सामान्य बन्दै गएको अवस्थामा पनि आर्थिक वृद्दि ३ देखि ४ प्रतिशत भन्दा माथि जान नसक्ने प्रक्षेपण गरिएको बताए ।