हामी सबैकाे संसारन्यूज

काठमाडौं । कमल थापा नेतृत्वको राप्रपा नेपालसँग चुनावी तालमेल गर्ने निर्णयसँगै राजेन्द्र लिङ्देनको राप्रपा एमालेबाट टाढिएको छ । केपी शर्मा ओली र कमल थापाबीच मिलन भएसँगै एमालेसँग चुनावी तालमेल गर्ने तयारीमा जुटेको राप्रपा बिच्किएको हो ।

एमालेसँग सहकार्य हुन नसक्ने देखेसँगै लिङ्देन नेतृत्वको राप्रपाले एकल रुपमै उम्मेदवारी घोषणा गर्न थालेको छ । ओलीको गृहनगर दमकमा राप्रपाले शनिबार राप्रपाले शक्ति प्रदर्शनसहित राम थापालाई उम्मेदवार बनाएको छ ।

दमकमा थापाको उम्मेदवारी घोषणाप्रति नेपाली कांग्रेस सकारात्मक देखिएको छ । कांग्रेसले थापालाई सघाउन सक्ने संकेत दिएको छ । पछिल्लो अवस्थालाई हेर्दा दमकमा एमाले इतरको राप्रपाको पक्षमा गठबन्धन बन्ने देखिएको सम्भावना बढेको छ ।

०७४ को संघीय चुनावमा झापामा राप्रपाले ओलीलाई सघाएको थियो । यसपटक राप्रपाले कांग्रेससहितका दलसँग सहकार्य गर्ने तयारी गरेको छ । जसको सिधा असर स्थानीय चुनाव मात्रै नभई संघीय चुनावमा पनि पर्ने देखिन्छ । झापामा एमालेसँगै राप्रपा पनि बलियो शक्तिको रुपमा रहेको छ ।

यदि संघीय चुनावसम्मै राप्रपाले एमाले बाहेकका दलसँग सहकार्य गरेमा ओलीलाई संघीय चुनावमा समेत जित्न मुश्किल पर्ने निश्चित छ ।