हामी सबैकाे संसारन्यूज

एजेन्सी। पाकिस्तानका विपक्षी दलहरूले पाकिस्तान मुस्लिम लिग(नवाजका शाहबाज शरीफलाई साझा प्रधानमन्त्रीको उम्मेदवार बनाएका छन् । सोमबार हुने प्रधानमन्त्रीको निर्वाचनका लागि दलहरुले संयुक्त उम्मेदवार बनाएका छन्।

इमरान खान सरकारविरुद्व अविश्वासको प्रस्ताव दर्ता भएसँगै शाहबाजको नाम चर्चामा आएको थियो । पाकिस्तानी मिडियाका अनुसार शाहबाज शरीफले अपराह्न ४ बजे उम्मेदवारी दर्ता गर्नेछन् ।

यसैबीच, पाकिस्तानको जियो न्यूजले नयाँ प्रधानमन्त्री चयनका लागि राष्ट्रिय सभाको बैठक सोमबार दिउँसो २ बजे बस्ने जानकारी दिएको छ । यसअघि सोमबार बिहान ११ बजे अधिवेशन सुरु हुने भनिएको थियो ।

‘पुरानो पाकिस्तानमा स्वागत छ’

पाकिस्तानको विपक्षी दलका शीर्ष नेता बिलावल भुट्टो जरदारीले आइतबार अविश्वासको प्रस्ताव पारित भएसँगै इमरान खानको आलोचना गर्दै, “पुरानो पाकिस्तानमा फिर्ता स्वागत छ” भन्ने अभिव्यक्ति दिएका छन् ।

विपक्षीले नयाँ पाकिस्तान बनाउने वाचासहित सन् २०१८ मा सत्तामा आएका इमरानलाई प्रधानमन्त्री पदबाट हटाइएको छ । यसरी देशको इतिहासमा अविश्वासको प्रस्तावमार्फत सत्ताबाट हट्ने उनी पहिलो प्रधानमन्त्री बनेका छन् । एजेन्सीबाट