हामी सबैकाे संसारन्यूज

काठमाडौं । दुई महिना बितिसक्दा पनि रुस–युक्रेन युद्ध रोकिएको छैन । तर विश्वमा आणविक हमलाको संकट गहिरिँदै गएको छ । रुसी राष्ट्रपति भ्लादिमिर पुटिनले पश्चिमी देशहरुलाई आणविक आक्रमणको धम्की दिएका छन् ।

बुधवार सेन्ट पिटर्सबर्गमा रुसी सांसदहरूलाई सम्बोधन गर्दै पुटिनले भने, “यदि कसैले बाहिर युक्रेनमा के भइरहेको छ त्यसमा हस्तक्षेप गर्न चाहन्छ भने, उनीहरूलाई थाहा हुनुपर्छ कि रुसले यसलाई कदापि सहन गर्दैन । रूसलाई धम्की दिने जो कोहीलाई पनि घातक माध्यमबाट जवाफ दिनेछौं।”

“रुससँग कसैले घमण्ड नगर्दा हुन्छ”

रुसी राष्ट्रपतिले रुससँग कसैले घमण्ड नगर्न पनि चेतावनी दिएका छन् । उनले युक्रेनमा हस्तक्षेप गर्नेविरुद्व रुस आणविक हतियार प्रयोग गर्न नहिचकिचाउने बताए ।

“हामीसँग आवश्यक सबै हतियार छ, जुन अरू कसैले घमण्ड गर्न सक्दैन, हामी तिनीहरूको बारेमा घमण्ड गर्न चाहँदैनौं, तर हामी तिनीहरूलाई प्रयोग गर्नेछौं”, पुटिनले भनेका छन्, “युक्रेनमा हस्तक्षेप गर्ने देशहरूले हामीलाई धम्की दिएमा रसियाले आणविक हतियार प्रयोग गर्न हिचकिचाउने छैन।”

पुटिनले परमाणु हतियारको प्रत्यक्ष उल्लेख गरेनन्, तर उनले नयाँ आणविक क्षेप्यास्त्रको उल्लेख गरेका थिए। रुसले केही दिनअघि यो अन्तरमहादेशीय ब्यालेस्टिक मिसाइलको सफल परीक्षण गरेको थियो । यो क्षेप्यास्त्रले विश्वको कुनै पनि लक्ष्यमा प्रहार गर्न सक्ने रुसको दाबी छ ।

रूसी सेना निश्चित रूपमा आफ्नो सबै उद्देश्य पूरा गर्नेछ

भ्लादिमिर पुटिनले फेरि युक्रेनमाथिको आक्रमणलाई विशेष अभियान भनेका छन् । उनले रुसी सेनाले आफ्ना सबै उद्देश्य अवश्य पूरा गर्ने बताए ।

पुटिनले युक्रेनले जैविक हतियार विकास गर्न खोजेको आरोप लगाएका छन् । जुन रुसको लागि वास्तविक खतरा भएको उनले बताए । एजेन्सीबाट