हामी सबैकाे संसारन्यूज

काठमाडौं । संयुक्त राष्ट्रसंघका महासचिव एन्टोनियो गुटेर्रेसको भ्रमणको बीचमा रुसले बिहीबार युक्रेनको कीभसहितको ठूलो भूभागमा बमबारी गरेको छ । कीभमा भएको आक्रमणमा कम्तीमा एक जनाको मृत्यु भएको र धेरै घाइते भएको समाचार संस्था रोयटर्सले जनाएको छ ।

आक्रमणमा दुईवटा भवन भत्किँदा केही मानिसहरु भग्नावशेषमुनि पुरिएका थिए । युक्रेनी राष्ट्रपति भोलोडिमिर जेलेन्स्कीले संयुक्त राष्ट्रसंघका महासचिव एन्टोनियो गुटेरेससँगको संयुक्त पत्रकार सम्मेलन गरेको केही समय लगत्तै रुसले आक्रमण गरेको थियो । यस आक्रमणबाट गुटेरेस र उनको टोली स्तब्ध भएका छन्।

आक्रमणले गुटेरेस र उनका चालक दल सकुशल रहेको बताइएको छ । यसैबीच युक्रेनका अन्य भूभागमा पनि ठूला विस्फोटको खबर आएको छ । पोलिन, चेर्निहाइभ र फास्टिभमा पनि बम विस्फोट भएको जनाइएको छ ।

युद्ध अपराधको आरोपको अनुसन्धानमा गुटेरेसको समर्थन

संयुक्त राष्ट्रसंघका महासचिव एन्टोनियो गुटेरेसले २१ औं शताब्दीमा युद्ध स्वीकार्य नहुने बताएका छन् । यससँगै उनले युद्ध अपराधको आरोपमा अन्तर्राष्ट्रिय फौजदारी अदालत (आइसिसी)बाट गम्भीर अनुसन्धान गरी जिम्मेवारी तोक्नुपर्ने मागको समर्थन गरे । तथापी संयुक्त राष्ट्र प्रमुखले रुसलाई विश्व निकायसँग वार्ता गर्न आग्रह गरेका छन् ।

गुटेर्रेसले युक्रेन आउनुअघि रुसी राष्ट्रपति भ्लादिमिर पुटिनलाई मस्कोमा भेटेका थिए।

पुटिनद्धारा फेरि आणविक आक्रमणको धम्की

जर्मनीमा अमेरिकासहित ४० देशका प्रतिनिधिको बैठकमा रुसको आणविक धम्कीका बाबजुद युक्रेनलाई हतियार दिने घोषणा गरेपछि रुसले फेरि आफ्नो धम्की दोहोर्‍याएको छ । रुस–युक्रेन युद्धको ६४ औं दिनमा रुसले युक्रेनलाई सहयोग गर्न बेलायतमा रहेका सैन्य अड्डाहरूलाई निशाना बनाउन सक्ने चेतावनी दिएको थियो । राष्ट्रपति भ्लादिमिर पुटिनले पनि युक्रेनमा पश्चिमले हस्तक्षेप गरे आणविक हमला असम्भव नभएको बताए ।

रुसी विदेश मन्त्रालयका प्रवक्ता मारिया जाखारोभाले युक्रेनलाई हतियार उपलब्ध गराउने नाटो देशमाथि रुसले आक्रमण गर्न सक्ने बताएकी छन् । यसले उत्तेजक बयान पछि युक्रेन फर्केका बेलायती कूटनीतिज्ञहरूलाई पनि निशाना बनाउन सक्छ। कीभमा दूतावास पुनस् खोल्ने बेलायतको घोषणामा, एक रुसी प्रवक्ताले चेतावनी दिए कि रसियाले सैन्य आपूर्तिमा बाधा पुर्‍याउन किभलाई हतियार आपूर्ति गर्ने नेटो देशहरूको क्षेत्रमा रहेको सैन्य अड्डाहरूमा पनि आक्रमण गर्न सक्छ। रुसी राष्ट्रपतिले पश्चिमी मुलुकलाई आणविक हमलाको चेतावनी दिएको भन्दै अन्तरमहादेशीय ब्यालेस्टिक मिसाइल ‘सरमत’ तर्फ पनि औंल्याएका छन् ।

हामी घमण्ड गर्दैनौं, तर हतियार प्रयोग गर्नेछौं : पुटिन

सेन्ट पिटर्सबर्गमा रुसी सांसदहरूलाई सम्बोधन गर्दै पुटिनले भनेका छन्, “हामीसँग आक्रमणका घातक हतियार छन् जसको अरू कुनै देशले गर्व गर्न सक्दैन ।” उनले ‘सरमत’ मिसाइलतर्फ औंल्याएका थिए । हामी तिनीहरूको बारेमा घमण्ड गर्न चाहँदैनौं, तर हामी तिनीहरूलाई प्रयोग गर्नेछौं, उनले भने। रूसी सेना निश्चित रूपमा आफ्नो उद्देश्य पूरा गर्नेछ।