हामी सबैकाे संसारन्यूज

काठमाडौं । स्टक ब्रोकर संघले मार्जिन कारोबार कार्यविधि संशोधन गर्नुपर्ने माग राखेको छ । संघले मार्जिन कारोबार सुविधा सम्बन्धी कार्यविधि हालकै अवस्थामा कार्यान्वयन गर्न नसकिने बताएको छ ।

जसका लागि कार्यविधि संशोधनको माग गर्दै संघले नेप्सेमा सुझाव पठाएको जनाएको छ । मार्जिन कारोबार सुविधा सम्बन्धी कार्यविधि संशोधन गरेर कार्यान्वयनमा आए लगत्तै संघले पुनः संशोधन गर्न माग गरेको छ ।

वर्तमान कार्यविधिमा संशोधन नगरी कार्यान्वयन प्रकृया अगाडि बढाउन नसकिने भन्दै संघले वैशाख ११ गते नेप्सेमा सुझाव पठाएको संघका अध्यक्ष सन्तोष मैनालीले सञ्चारमाध्यमलाई बताएका छन् ।

संघले नेप्सेमा पेश गरेको सुझावमार्फत ब्रोकरहरुको खुद सम्पत्तिको मार्जिन कारोबारको सुविधालाई १० गुणा बनाउन माग गरिएको छ ।
अहिले ब्रोकरहरुले खुद सम्पत्तिको २ गुणसम्म मार्जिन कारोबारको सुविधा प्राप्त गर्ने गरेका छन् ।

संघले कार्यविधि संशोधनका लागि दिएको सुझावमा ‘क’,‘ख’ र ‘ग’ वर्गका बैंक तथा वित्तीय संस्थासँग ऋण लिइ लगानी गर्न सक्ने व्यवस्था गर्नुपर्ने माग गरेको छ ।

त्यस्तै संघले धितोपत्रको मूल्यांकन बढीमा ७० प्रतिशतसम्म कायम गर्नुपर्ने माग गरेको छ । मार्जिन कारोबार अन्तर्गत खरिद भएका धितोपत्रहरु कारोबार सम्पन्न भएपछि पुलमा राख्नुपर्ने र सो धितोपत्रमार्फत ऋण लिन पाउनुपर्ने माग संघले गरेको छ ।

सेयर धितो राखेर खरिद गरेको सेयर सुरक्षणका लागि ब्रोकरको अधिनमा हुनुपर्ने र उक्त सेयरलाई बैंकमा धितो राख्न पाउनु पर्ने माग संघले नेप्सेमा बुझाएको सुझावपत्रमार्फत गरेको छ ।

संघका अध्यक्ष मैनालीले भनेका छन्, ‘सेयर धितोको जति भ्यालुएसन हुन्छ त्यसको ७० प्रतिशत कर्जा दिने हो, ७० मध्ये ५० प्रतिशत बैंक र बाँकी २० प्रतिशत ब्रोकरले हाल्छन्, ‘बाँकी ३० प्रतिशत लगानीकर्ताको हुन्छ ।’ कारोबार राफसाफपछिको सेयर धितो राख्ने सुविधा भएमा इक्विटीको ६÷७ गुणासम्म रकम लगानी गर्न सकिने ब्रोकरहरुको बुझाई छ । प्रविधिको विकास गर्दै कार्यान्वयनमा जानुपर्ने र प्रविधिको विकास नगरी एकै पटक धेरै लगानीकर्ता समक्ष पुग्न नसकिने ब्रोकरहरुको धारणा छ ।