हामी सबैकाे संसारन्यूज

काठमाडौं । रौतहटमा बम विस्फोट गरी सामूहिक नरसंहार मच्चाएको अभियोगमा पुर्पक्षका लागि थुनामा रहेका नेपाली कांग्रेसका नेता तथा निलम्बित सांसद मोहम्म अफताव आलमलाई धरौटीमा रिहा गर्न सर्वोच्च अदालतले अस्वीकार गरेको छ । शुक्रबार सर्वोच्च अदालतका न्यायाधीशद्वय सुष्मालता माथेमा र नहकुल सुवेदीको संयुक्त इजलासले यसअघि उच्च अदालतले गरेको आदेशलाई नै सदर गरेको हो ।

इँटाभट्टामा मानिसलाई जिउँदै जलाएर हत्या गरेको तथा विष्फोटक पदार्थ बम समेत प्रयोग गरी हत्या प्रयास गरेको आरोपमा नेपाली कांग्रेसका प्रतिनिधि सभा सदस्यसमेत रहेका आलममाथि मुद्दा चलाइएको छ । उनी हाल ललितपुरको नख्खुस्थित कारागारमा छन् ।

आलमको निवेदन लामो समयदेखि सर्वोच्चमा विचाराधीन रहेको थियो। सर्वोच्चले आलमको निवेदनमा दाबी गरिएअनुसार धरौटी तथा तारेखमा राखेर मुद्दाको पुर्पक्ष गराउनुपर्ने माग अस्वीकार गरेपछि अब उनी मुद्दाको टुंगो नलागेसम्म जेलमै बस्नुपर्ने भएको छ।

आफूलाई थुनामुक्त गरी साधारण तारेखमा मुद्दा लड्न पाउँ भन्दै आलमले सर्वोच्च अदालतमा निवेदन दिएका थिए । उक्त निवेदनअनुसार प्रत्येक साता शुक्रवार पेशीमा चढ्दै आए पनि सुनुवाइ भइरहेको थिएन । तर गत साता पेशीमा चढेपछि सुनुवाइ सम्पन्न भएर आज आदेश गरिएको हो ।