हामी सबैकाे संसारन्यूज

काठमाडौं । श्रीलंकाका प्रधानमन्त्री महिन्दा राजापाक्षेले देशमा गम्भीर आर्थिक संकटका बीच सोमबार राजीनामा दिएका छन् । श्रीलंकाको स्थानीय मिडियाले जनाएअनुसार अन्तरिम सरकार गठन गर्न प्रतिपक्षको मागप्रति झुकेर राजापाक्षेले यो कदम चालेका हुन् ।

यसअघि प्रधानमन्त्री राजापाक्षेले जनताको हितका लागि आफू जुनसुकै त्याग गर्न तयार रहेको बताएका थिए । राजापाक्षेको पछिल्लो अभिव्यक्तिसँगै उनको राजीनामा आउने अनुमान गरिएको थियो ।

उनका भाइ राष्ट्रपति गोताबाया रापाजाक्षेले सीधै आफ्नो इच्छा व्यक्त नगरेको भएपनि राजीनामाको माग गरेका थिए ।

प्रधानमन्त्री पदबाट राजीनामा दिएपछि महिन्दा राजापाक्षेले सर्वसाधारणलाई संयमता अपनाउन अपिल गरेका छन् । उनले ट्विट गर्दै भनेका छन्, “जब भावनाहरु चर्को हुन्छ, हामीले याद राख्नु पर्छ कि हिंसाले हिंसा मात्र निम्त्याउँछ।” महिन्दा राजापाक्षेले हामी जुन आर्थिक संकटमा छौं, त्यसको एउटै आर्थिक समाधान आवश्यक रहेको बताएका छन् ।

प्रधानमन्त्री विरुद्ध आक्रोश पोखियो

विगतमा गोटाबाया र प्रधानमन्त्री महिन्दाले चर्को दबाबका बाबजुद पनि राजीनामा दिन अस्वीकार गरेका थिए । इन्धन, खाना पकाउने ग्यास र विद्युत् कटौती अन्त्यको माग गर्दै सडकमा उत्रिएका जनताले उनको विरुद्ध चर्को प्रदर्शन गरेका छन् ।

प्रदर्शनकारीहरूले राजपाक्षे परिवारले राजनीति छोड्नुपर्ने माग गरेका थिए । आन्दोलनकारीको नारा “लुटेको सम्पत्ति फिर्ता गर !” भन्ने थियो ।