हामी सबैकाे संसारन्यूज

काठमाडौं । नेकपा (एमाले)का अध्यक्ष केपी शर्मा ओलीले निर्वाचनमा राज्यसंयन्त्रको चरम दुरुपयोग गरिएको आरोप लगाएका छन् । बिहीबार प्रतिनिधिसभाको बैठकलाई सम्बोधन गर्दै उनले पञ्चायतकालमा समेत अहिलेको जस्तो राज्यसंयन्त्रको दुरुपयोग नभएको बताए ।

सत्तापक्षको तर्फबाट मतदातालाई भयभित बनाउने, आक्रान्त बनाउने काम भएको उनको आरोप छ ।

राज्यसंयन्त्रको यो तहको दुरुपयोग पञ्चायतकालमा पनि भएको थिएन, यस्तो नांगो ढंगले सत्ता कब्जै गर्ने खालको काम पञ्चायतमा पनि भएको थिएन”, उनले भने, “निर्वाचन स्वच्छ हुन सकेन, धाँधलीरहित हुन सकेन, सत्तापक्षले बूथ कब्जा गरेको ठाउँमा प्रहरी निरीह भएर बसेको छ । उम्मेदवारको घरमा बम पड्काइएको छ ।”

प्रतिपक्षलाई सिध्याउने घोषित नीति नै लिएर निर्वाचन गरिएको उनको भनाइ थियो। “गठबन्धनको घोषित नीति थियो धूलो प्रतिपक्षलाई चटाइदिने, पत्तासाफ गरिदिने । एउटा ठाउँमा पनि प्रतिपक्षका कारण स्थगित भएको होइन”, ओलीले भने ।

१४ दिनसम्म पनि परिणाम आउन नसक्नुप्रति ओलीको आपत्ति छ । मतगणनामा नियोजित ढिलाई भएको बताए ।