Sansar News
काठमाडौं । क्यानडा भ्रमणमा रहेको नेपाली राष्ट्रिय क्रिकेट टोलीले आज क्यानडाको क्रिकेट टोलीसँग प्रतिस्पर्धा गर्दैछ । पहिलो एकदिवसीय अन्तर्राष्ट्रिय अन्तर्गत नेपाली टोलीले आज राती ९ः४५ बजे घरेलु टोली क्यानडासँग सामना गर्न लागेको हो ।
किङ सिटी स्टेडियममा हुने खेल दुई खेलको एकदिवसीय सिरिजका लागि क्यानडा पुगेको नेपाल पहिलो खेलमा जित निकाल्दै सिरिजमा सुखद सुरुआत गर्न चाहन्छ । नेपाल र क्यानडाबीचको दोस्रो एकदिवसीय बुधबार हुनेछ ।
विश्वकप लिग टू अन्तर्गत स्कटल्याण्डमा आयोजना हुने त्रिकोणात्मक एकदिवसीय सिरिज अघि नेपालले क्यानडाको भ्रमण गरेको हो । यस अघि नेपाली टोलीले स्थानीय ओन्टारियो क्लबसँग दुई अभ्यास खेल खेलेको थियो । दुबै खेल नेपालले जितेको थियो ।
क्यानडासँगको सिरिजपछि नेपाली टोली स्कटल्याण्ड प्रस्थान गर्नेछन् । नेपालले स्कटल्याण्डमा हुने ‘लिग टू’ अन्तर्गतको सिरिजमा घरेलु टोली र नामिबियासँग खेल्नेछ ।
वि.सं.२०७९ असार २१ मंगलवार १२:२७ मा प्रकाशित
