Sansar News
काठमाडाैं । प्रभु बैंकले सेञ्चुरी कमर्सियल बैंकलाई प्राप्ति गर्ने निर्णय आइतबार गरेको छ । यी दुई बैंकबीच मंसिरभित्र एकीकृत कारोबार गर्ने प्रारम्भिक सहमति भएको हो ।
एकीकृत कारोबार प्रभु बैंकको नामबाट हुने बैंकले जनाएको छ । नयाँ बैंकको प्रमुख कार्यकारी अधिकृतमा प्रभु बैंकका अशोक शेरचनले निरन्तरता पाउने बताइएको छ । सेञ्चुरी बैंकका मनोज न्यौपानेलाई वरिष्ठ प्रमुख कार्यकारी अधिकृत बनाइने सहमति भएको छ ।
सहमति अनुसार, प्रभु बैंकका डेपुटी प्रमुख कार्यकारी अधिकृत मणिराम पोखरेल न्यौपानेपछिको प्रोटोकलमा हुने छन् । प्रभु र सेञ्चुरीमा त्यसपछि नायब, सहायक महाप्रबन्धकहरु छन् । उनीहरु त्यही पदमा हुने छन् । नयाँ बैंकको सञ्चालक समितिमा प्रभु बैंकबाट तीन र सेञ्चुरीबाट तीन जना जाने छन् । स्वतन्त्र सञ्चालक साबिकको प्रभु बैंकले छान्ने बताइएको छ ।
यी दुई बैंकबीच लामो समयदेखि मर्जरको कुराकानी भएको थियो । राष्ट्र बैंकबाट अन्तिम स्वीकृति लिएपछि दुवै बैंकले केही समयका लागि स्वैच्छिक अवकाश योजना समेत ल्याउने सहमति भएको छ ।
हाल प्रभु बैंकमा २३ सय कर्मचारी छन् भने सेञ्चुरीमा १२ सय कर्मचारी छन् । प्रभुको २१६ वटा शाखा छ भने सेञ्चुरीको १२६ वटा छ । सेञ्चुरीले पुमरी प्रणाली चलाउँछ भने प्रभुले फिन्याकल चलाउँछ । यसो हुँदा दुवै बैंकको प्रणाली मिलान गर्न केही समय लाग्ने बताइएको छ ।
बराबरी हैसियत अर्थात सेयर आदानप्रदान अनुपात एक बराबर एक हुने भएकाले नयाँ बन्ने बैंकको चुक्ता पुँजी २२ अर्ब २६ करोड रुपैयाँ पुग्ने छ ।
वि.सं.२०७९ साउन १६ सोमवार १२:४९ मा प्रकाशित
