हामी सबैकाे संसारन्यूज

काठमाडौं । राष्ट्रिय स्वतन्त्र पार्टीका अध्यक्ष रवि लामिछानेले आफ्नो पार्टीमा प्रवेश गर्न पाइने तर पद खोज्न नपाइने बताएका छन् ।

कर्णाली प्रदेशको सुर्खेतमा आयोजित सभालाई सम्बोधन गर्दै लामिछानेले आफ्नो पार्टीमा पद खोज्न आउनेलाई प्रवेश नै नदिने बताएका हुन् ।

लामिछानेले आफ्नो पार्टीमा प्रवेशका क्रममा पद तोक्नेलाई पार्टी र आफ्नो जीवन रहेसम्म प्रवेश नदिने समेत बताएका छन् ।

उनले अन्य पार्टीमा पद नपाएका कारण पदकै लागि आफ्नो पार्टीमा आउन खोज्नेलाई ठाउँ नभएको भन्दै भने–‘जसले ती पार्टीमा बेथिती रह्यो,मैले चिर्न सकिन भन्छ त्यस्ता मान्छेलाई स्वागत छ ।’ लामिछानेले भने ।

लामिछानेले कर्णालीको मुहार फेर्ने कामको सुरुवात कर्णालीबासीले नै गर्नुपर्ने बताउँदै त्यसका लागि कर्णालीवासीले आफ्नो भोट फेरेर गर्न सक्ने बताए । ‘तपाईले हाल्ने मतबाहेक तपाईंको भाग्य बदल्ने अरु कुनै उपाय छैन’ लामिछानेले भने ।

यसपाली पनि आफ्नो मत फेर्न चुके पाँचवर्ष पुनः दुःख पाइने बताए । ‘यसपटक पनि मत फेर्न सकेनौं भने फेरि अर्को ५ वर्षका लागि यही सुनाउनुपर्नेछ, तर मलाई थाहा छैन आफ्नो सुविधा सम्पन्न जीवन छाडेर अर्को हर्क साम्पाङहरु, अर्का स्वतन्त्र उम्मेदवारहरु आउँछन्, आउँदैनन्, अर्का बालेनहरु र गोपी हमालहरु आउँछन् कि आउँदैनन् ?’