Sansar News
काठमाडौं । सत्ता गठबन्धनको बैठक बालुवाटारमा बस्दैछ ।
प्रधानमन्त्री निवास बालुवाटारमा बिहान ९ बजे बस्न लागेको उक्त बैठकले आगामी मंसिर ४ गतेका लागि घोषित प्रदेश र संघको निर्वाचनका विषयमा छलफल गर्ने बताइएको छ ।
यसअघि स्थानीय तहको निर्वाचनमा जस्तै तालमेल गरेर जाने छलफल गर्दै आएका गठबन्धनभित्रका पाँच दलले संघ र प्रदेशको निर्वाचनमा पनि गठबन्धन गरेरै जाने छलफल गर्दै आएका छन् । आजको बैठकमा सिट बाँडफाँट र चुनावी रणनीतिका बारेमा छलफल हुने बताइएको छ ।
बिहीबार बसेको मन्त्रिपरिषद्को बैठकले प्रदेश र प्रतिनिधिसभाको निर्वाचन मंसिर ४ मा गर्ने घोषणा गरेसँगै गठबन्धनको बैठक बस्न लागेको हो ।
बिहीबार चुनावको मिति घोषणा गरेसँगै प्रतिपक्षी दल एमालेले यसको स्वागत गर्दै मिति घोषणा हुनु अपेक्षित र स्वभाविक भएको बताएको छ भने सत्ता गठबन्धनभित्रका दलले पनि त्यसको स्वागत गर्दै निर्वाचनको तयारीमा होमिन नेता तथा कार्यकर्तामा आव्हान गरेका छन् ।
त्यसैगरी निर्वाचन आयोगले पनि बुधबारै पत्रकार सम्मेलन गरेर दुवै सभाको निर्वाचन गराउन आयोग तयार रहेको बताएको छ ।आयोगका प्रमुख दिनेश कुमार थपलियाले तोकिएको दिन स्वतन्त्र र निष्पक्षरूपमा निर्वाचन गराउन आफू पूर्ण सक्षम रहेको बताएका छन् । file photo
वि.सं.२०७९ साउन २० शुक्रवार ०८:५८ मा प्रकाशित
