Sansar News
काठमाडौं । सानिमा बैंकले उपत्यका बाहिरका विद्यार्थीहरुलाई छात्रवृत्ति प्रदान गर्ने भएको छ । बैंकले संस्थागत सामाजिक उत्तरदायित्वअन्तर्गत उपत्यका बाहिरका विद्यार्थीहरुलाई छात्रवृत्ति प्रदान गर्ने भएको हो ।
बैंकले काठमाडौं उपत्यका बाहिरका प्रत्येक शाखाबाट दुई जना विद्यार्थीलाई कक्षा ११ र १२ का लागि विद्यार्थीकै रोजाईको शैक्षिक संस्था र विषयमा उच्च शिक्षा हासिल गर्न छात्रवृत्ति प्रदान गर्दै आइरहेको जनाएको छ । बैंकले यसकै निरन्तरताका लागि उच्च माध्यमिक तह (प्लस टु) अध्ययन गर्नका लागि काठमाडौं उपत्यका बाहिरका शाखाहरुबाट छात्रवृत्ति आवेदन खुला गरेको जनाएको छ ।
उक्त छात्रवृत्ति अन्तर्गत शैक्षिक शुल्क, शैक्षिक सामग्री र नगदवृत्ति मासिक दुई हजार गरी प्रत्येक विद्यार्थीलाई ५० हजार रुपैयाँसम्मको छात्रवृत्ति प्रदान गरिने बताइएको छ ।
बैंकका अनुसार छात्रवृत्ति आवेदन आगामी भदौ ३१ गतेसम्म दिन सकिनेछ ।
यस छात्रवृत्ति सम्बन्धी विस्तृत जानकारी बैंकको वेवसाइटबाट लिन सकिने बैंकले जनाएको छ । बैंकले शिक्षा, स्वास्थ्य लगायत अन्य क्षेत्रहरुमा विपन्न वर्गका जनतालाई प्रत्यक्ष फाइदा हुने गरी विभिन्न कार्यक्रमहरु संचालन गर्दै आइरहेकोमा प्लस टु पढ्नका लागि उपत्यका बाहिरका बिपन्न विद्यार्थीहरुलाई सहयोग गर्न लागेको जनाएको छ ।
वि.सं.२०७९ साउन २३ सोमवार १४:२९ मा प्रकाशित
