हामी सबैकाे संसारन्यूज

काठमाडौँ । नविल बैंकको आर्थिक वर्ष २०८२/२०८३ को वित्तीय विवरण सार्वजानिक गरेको छ । सार्वजनिक गरेको विवरण अनुसार बैंकले गत आर्थिक वर्षमा नाफा, सञ्चालन क्षमता, निक्षेप, कर्जा, सम्पत्ति तथा लाभांश क्षमतामा उल्लेखनीय सुधार भएको देखिएको हो ।

बैंकले सार्वजनिक गरेको अपरिष्कृत वित्तीय विवरण अनुसार गत आर्थिक वर्षमा बैंकको खुद नाफा ३३ प्रतिशतले बढेर ७ अर्ब ९० करोड रुपैयाँ पुगेको छ ।

नाफासँगै बैंकको सञ्चालन मुनाफामा पनि २५ प्रतिशतको बढोत्तरी भई ११ अर्ब ५६ करोड रुपैयाँ पुगेको छ । समीक्षा अवधिमा बैंकको समग्र वासलातको आकार १५ प्रतिशतले विस्तार भई ७ खर्ब ३४ अर्ब रुपैयाँ नाघेको छ ।

गत आवमा बैंकको कुल कर्जा प्रवाह १२.५२ प्रतिशतले वृद्धि भई ४ खर्ब ७ अर्ब रुपैयाँ पुगेको छ । यससँगै समग्र वाणिज्य बैंकहरूले प्रवाह गरेको कुल कर्जामा नबिल एक्लैको बजार हिस्सा ९ प्रतिशतभन्दा माथि पुगेको छ ।

यस्तै, बैंकको कुल निक्षेप सङ्कलन ६ खर्ब रुपैयाँको विन्दुमा पुगेको छ । कर्जा विस्तारसँगै बैंकको खुद ब्याज आम्दानी ४.२ प्रतिशतले बढेर १७ अर्ब रुपैयाँ नाघेको छ भने गैर–ब्याज आम्दानीमा आएको सुधारका कारण कुल सञ्चालन आम्दानी ६.३ प्रतिशतले वृद्धि भई २२ अर्ब रुपैयाँ माथि पुगेको छ ।

बैंकले सम्पत्तिको गुणस्तर सुधारमा उल्लेख्य प्रगति गरेको छ । कुल निष्क्रिय कर्जा ०.२८ प्रतिशत विन्दुले घटेर ४.२० प्रतिशतमा झरेको छ भने खुद निष्क्रिय कर्जा ०.५ प्रतिशतमा सीमित छ ।

बैंकले खराब कर्जाका लागि कुल निष्क्रिय कर्जाको करिब ११९ प्रतिशर्त प्रोभिजनिङ’ (कर्जा नोक्सानी व्यवस्था) गरेको छ, जसले सम्भावित वित्तीय जोखिमलाई सहजै धान्न सक्ने बलियो आधार देखाउँछ ।

आम्दानी र नाफामा आएको बढोत्तरीले बैंकको लाभांश वितरण क्षमतामा पनि व्यापक सुधार ल्याएको छ । सो अवधिमा बैंकको वितरणयोग्य मुनाफा ३४ प्रतिशतले बढेर ५ अर्ब १६ करोड रुपैयाँ पुगेको छ ।

यस अनुसार बैंकको प्रतिशेयर वितरणयोग्य मुनाफा १९ रुपैयाँ १० पैसा कायम भएको छ भने प्रतिशेयर आम्दानी २ रुपैयाँ ३६ पैसा पुगेको छ । बैंकको विवरण अनुसार पूँजी पर्याप्तता, शेयरधनीको प्रतिफल ( तथा सम्पत्तिको प्रतिफल लगायतका प्रमुख वित्तीय सूचकहरूमा समेत उल्लेख्य सुधार आएको छ ।