Sansar News
काठमाडौं । मंगबारदेखि काठमाडौंमा रहेका अनधिकृत संरचना भत्काउन डोजर अभियान संचालन गरेका काठमाडौं महानगरपालिकाका मेयर बालेन शाह शुक्रबार पनि अभियानलाई निरन्तरता दिएका छन् ।
मेयर बालेन शुक्रबार त्रिपुरेश्वरस्थित राहदानी विभाग परिसरमा बनेका अनधिकृत संरचना हटाउन डोजरसहित त्यहाँ पुगेका हुन् ।
एकसाता अघि थापाथलीमा रहेको नर्भिक अस्पतालमा बनेका अनधिकृत संरचना हटाउन निर्देशन दिएका मेयर बालेनले मंगलबार बानेश्वर क्षेत्रमा रहेका अनधिकृत संरचना हटाएर अभियानको सुरुवात गरेका थिए । साथै बुधबार पनि सुन्धारास्थित काठमाडौं मल, न्युरोडको आरबि कम्प्लेक्स, रन्जना गल्ली, दरबारमार्ग, तथा कोटेश्वरमा रहेका अनधिकृत संरचना भत्काउन पुगेका थिए ।
त्यसैगरी बिहीबार पनि बालेनले बानेश्वरमा रहेको अल्फाबिटा कम्पलेक्समा बनेको अवैद्य संरचना हटाएका थिए । त्यहाँ अल्फाबिटाका घरधनी द्धिराज शर्मासँग उनको चर्काचर्की समेत परेको थियो । शर्माले घरको नक्शा आफुसँग नभएको भनेपछि बालेन महानगरमै आएर डोजरसहित नक्शा लिएर अल्फाबिटामा पुगेका थिए ।
महानगरले राजधानीका विभिन्न ठाउमा बनेका अबैद्य संरचना भत्काउन ३५ दिने सूचना यसअघि नै जारी गरेपनि घरधनीहरुले त्यसमा अटेर गरेपछि बालेन नगर प्रहरी प्रमुख राजनाथ पाण्डे र ट्राफिक प्रहरी प्रमुख मिरा चौधरीसहित आफै ती स्थानमा पुगेर संरचना भत्काउने अभियानमा लागेका हुन् ।
अल्फाबिटामा डाेजर चलाएपछि बालेन्द्रले लेखे- मैले के बिराएँ ?
वि.सं.२०७९ भदौ १० शुक्रवार १३:४९ मा प्रकाशित
