हामी सबैकाे संसारन्यूज

काठमाडौं । प्रतिनिधिसभा तथा प्रदेशसभाको निर्वाचनमा तालमेल गरेर जाने निर्णय गरेका सत्ता गठबन्धनका दलहरुबीच सीट बाँडफाँटको विषय अझैसम्म पनि टुंगीएको छैन् । तर, पछिल्ला बैठकहरु सकारात्मक दिशातिर गएको नेताहरुको दाबी छ ।

मंगलबार धनगढी पुगेको माओवादी केन्द्रका अध्यक्ष पुष्पकमल दाहाल ‘प्रचण्ड’ सिट बाँडफाँटमा मोटामोटी सहमति भइसकेको बताएका छन् । उनले नेपाली कांग्रेस ८० सीट वरपर सहमत भएको पनि बताएका छन् । उनका अनुसार माओवादी केन्द्रले ६० सीटसम्म पाउन सक्छ ।

तर, प्रचण्डको अभिव्यक्तिलाई कांग्रेसले भने सही नभएको बताएको छ । कांग्रेस प्रवक्ताले प्रचण्डको अभिव्यक्ति प्रस्तावमात्रै भएको बताएका छन् ।

कांग्रेस प्रवक्ता डा. प्रकाशशरण महतलले भनेका छन्, “त्यो उहाँ (प्रचण्ड)को प्रस्ताव हो । हामीले परिणामकेन्द्रीत भएर बाँडफाँट गरौं भनिरहेका छौं तर, टुंगीएको छैन”, उनले भनेका छन् ।

उनले दलहरु लचिलो भने हुनुपर्ने बताए । “हामी दिल फुकाउन तयार छौँ तर, त्यो मत आधारसँग मिल्दो पनि त हुनु पर्‍यो”, उनले भनेका छन् ।

१६५ सीटमा कसको दाबी कति ?

दलहरुबीच एकातिर बाँडफाँटको मोडालिटीमा सहमति छैन भने अर्कोतिर सिट संख्यामा पूर्ववत् अडान कायमै छ । १६५ सिटमा दलहरुको दाबी संख्या भने २ सयभन्दा बढी छ । गठबन्धनमा नेपाली कांग्रेसले १००, माओवादी केन्द्रले ६०, एकीकृत समाजवादीले ४०, जसपाले ३२ र जनमोर्चा २ सिटमा दाबी प्रस्तुत गरेका छन् । यसमा सबै दल लचिलो नभएसम्म बाँडफाँट टुंगीने अवस्था छैन ।

गत बिहीबार बसेको गठबन्धनको बैठकमा दलहरुबीच कांग्रेसले ८५–९०, माओवादीले ४५–५०, एकीकृत समाजवादीले १८–२०, जसपाले १५–१८ सिट लिनुपर्ने छलफल भएको थियो । तर, निष्कर्ष भने निस्कन सकेको छैन ।