हामी सबैकाे संसारन्यूज

काठमाडौं । काठमाडौं महानगरपालिकाले नक्सा पास नगरी बनाइएका घर तथा भवनको नक्सा ९० दिनभित्र पास गर्न निर्देशन दिएको छ । बिहीबार सार्वजनिक सूचना जारी गर्दै महानगरपालिकाले नक्सा पास नगरी बनाइएका भवनका लागि ९० दिन र पर्खालका लागि ३५ दिनभित्र पास गर्न महानगरले निर्देशन दिएको हो ।

महानगरद्वारा जारी सूचनामा काठमाडौँ महानगरपालिका क्षेत्रभित्र निर्माण भएका सरकारी, संस्थागत, निजी वा जुनसुकै प्रकृतिको भए पनि भवनको नक्सा पास नगरी बनाइएको र मापदण्ड अनुकूल रहेको त्यस्ता भवनको नक्सा ९० दिनभित्र पास गर्न भनिएको छ । महानगरको सहरी व्यवस्थापन विभागले तोकिएको समयभित्र नक्सा पेस नगरेमा त्यस्ता भवनहरूको विवरण सङ्कलन गरी स्थानीय सरकार ऐन २०७४ र प्रचलित भवन निर्माण मापदण्ड, संहिता, कार्यविधि र कार्यालयको निर्णय बमोजिम कारबाही गरिने जनाएको छ ।

यसैगरी, काठमाडौँ महानगरपालिका शहरी व्यवस्थापन विभागले सीमा पर्खाल नियमित गर्ने तथा अनधिकृत सीमा पर्खाल हटाउन पनि ३५ दिने सूचना जारी गरेको छ । महानगरले यस्ता पर्खालको नक्सा आजको मितिले ३५ दिनभित्र पास गर्न भनेको छ । सूचनामा प्रचलित मापदण्ड अनुकुल भएका तर नक्सा पास नगरी निर्माण गरिएका सीमा पर्खाल नियमित गर्न प्रयोजनार्थ नक्सा पेस गर्न भनिएको छ ।

उल्लेखित ३५ दिनभित्रको समयसिमामा नियमित हुने प्रकृतिका सीमा पर्खालको हकमा नक्सा पेस नगरेमा र मापदण्ड विपरीतका सीमा पर्खाल नहटाइएमा महानगरले भत्काउने उल्लेख छ ।