हामी सबैकाे संसारन्यूज

काठमाडौं । नेपाली कांग्रेसका नेता शेखर कोइरालाले कांग्रेसले सय सिट भन्दा कममा सहमति गरे विद्रोह हुनसक्ने बताएका छन् ।

बिपी जयन्तीको अवसरमा प्रेस युनियन केन्द्रीय समितिद्धारा जनकपुरमा आयोजित ‘बीपी विचार, प्रेस तथा अभिव्यक्ति स्वतन्त्रता र अबका चुनौती’ विषयक कार्यक्रममा नेता कोइरालाले सय भन्दा कम सिट लिएर चुनावमा जाँदा पार्टीमा विद्रोह हुन सक्ने बताएका हुन् ।

उनले स्थानीय निर्वाचनमा स्थानिय पालिकाहरुलाई कहाँ गठबन्धन गर्ने र नगर्ने भन्ने जिम्मा दिइए पनि अबको प्रतिनिधिसभा र प्रदेशशभाको निर्वाचनमा केन्द्रीय समितिले गठबन्धन गर्ने तर त्यो कांग्रेसले एकल बहुमत ल्याउन गर्ने र पाँचवर्ष स्थायी सरकार दिने भन्ने निर्णय गरेको बताए ।

‘बहुमत बनाउन कम्तिमा पनी सय सिट हामीले बनाउनु पर्यो । उहाँहरु सय सिट दिने पक्षमा हुनुहुन्न । १६५ सिटमै हामी उठ्यौं भने आकांक्षीहरु नपुग्ने अवस्था छ । त्यसमा पनि तालमेल गर्दा धेरै सिटहरु छोड्नुपर्ने हुन्छ । छोड्दाखेरी हाम्रो समानुपातिक भोट कम हुन सक्छ । त्यसले नेपाली कांग्रेसभित्र विग्रह र विरोध हुन सक्छ ।’

उनले यस विषयमा पटक–पटक केन्द्रीय नेतृत्वको अगाडि राखेका छौं । एक दुई दिनमा गठबन्धनले केही निर्णय गर्नैपर्ने बताउँदै नेपाली कांग्रेस यतिबेला अत्यन्तै अप्ठेरो अवस्थामा रहेको बताएका छन् ।

उनले गठबन्धन के हुन्छ भन्ने कुरा निर्वाचनपछि मात्रै थाहा हुने बताउँदै कुनैपनि दलसँग कांग्रेसको विचार र सिद्धान्त नमिल्ने बताए ।

‘त्यो माओवादी, एकिकृत समाजवादी, जसपा या राष्ट्रिय जनमोर्चा भन्नुस् यी चारवटा दलहरुसँग हाम्रो कुनै पनि किसीमको विचार र सिद्धान्त मिल्दैन । विचार सिद्धान्त नमिले पनि हामीले एमालेलाई परास्त गर्न गठबन्धन गर्यौ ।’ नेता कोइरालाले भने ।