हामी सबैकाे संसारन्यूज

रोशनी गिरी, सुनसरी

१
आफ्नै भाग्य खोटो छ दिन्न कसैलाई दोष
मेरो कुभलो चिताउनेको नि सधैं भलो होस
दुइचार जना शत्रु लाग्दैमा फरक पर्दैन मलाई
कहिले पनि मेरो खुशिमा दैव चाहिँ नलागोस

२
दुख्दो रै’छ मुटू कहिले काहीँ पराई बन्दा त
नजिक हँुदा राम्रो पर बसि खोइरो खन्दा त
मलाइ ती पराई नै प्यारो लाग्छ आजभोली
दिन सकुञ्जेल नजिक हुने आफन्त भन्दा त

३
जसले हुर्कायो, बढायो र पढायो ज्यान दिएर
पुग्दैन कहिले मुखले मात्र गुणगान दिएर
बर्षभरी रुवाउने वास्तै नगर्ने त्यो सन्तानले
खुशी होला र बा’को मन एकदिन सम्मान दिएर ?

४
ननिभ्ने गरि यो प्रेमको दियो बालेर राख्नु
भत्किएला कहि कतै मायाले टालेर राख्नु
सम्बन्ध सिसा जस्तै हो, टुटेपछी जोडिदैन
त्यसैले सधैंभरि प्रिय मान्छे सम्हालेर राख्नु

५
यो दुनियाँ हेर्दा मात्रै हो रंगिन जान्दाजान्दै पनि
हुने छ पाप धर्मको छानबिन जान्दाजान्दै पनि
किन हो कुन्नी घमण्ड गर्छन यी मान्छेहरू सधैं
मर्नुपर्छ सबैले यहाँ एकदिन जान्दाजान्दै पनि