हामी सबैकाे संसारन्यूज

काठमाडौं । मंसिर ४ मा हुँदै गरेको प्रतिनिधिसभा तथा प्रदेशसभा निर्वाचनमा उम्मेदवार बनेका स्वतन्त्र उम्मेदवारहरुले चुनाव चिन्ह पाएका छन् । आयोगले तोकेको निश्चित चिन्हबाट उम्मेदवारहरुले चुनाव चिन्ह पाएका हुन् ।

एमाले छाडेर स्वतन्त्र उम्मेदवार बनेका नेता घनश्याम भुसालले त्रिभुज चुनाव चिन्ह पाएका छन् । रुपन्देही–१ बाट उम्मेदवार बनेका भुसाललाई आयोगले त्रिभुज चुनाव चिन्ह दिएको हो ।

त्यस्तै, एमाले छाडेर स्वतन्त्र उम्मेदवारी दिएका प्रभु शाहले चापाकल (पानी तान्ने कल) चुनाव चिन्ह पाएका छन् । निर्वाचन अधिकृतको कार्यालयले उनलाई चापाकल चुनाव चिन्ह दिएको हो । शाह रौतहट–३ बाट उम्मेदवारी दिएका छन् ।

एमाले छाडेर स्वतन्त्र उम्मेदवारी दिएकी नेतृ गंगा चौधरीले लौरो चुनाव चिन्ह पाएकी छिन् । दाङ क्षेत्र नम्बर १ बाट उम्मेदवारी दिएकी उनलाई आयोगले लौरो चुनाव चिन्ह दिएको हो ।

यस्तै, चितवन–३ मा कांग्रेसको तर्फबाट बागी उम्मेदवार बनेका दिनेश कोइरालाले माछा चुनाव चिन्ह पाएका छन् । यता, झापा–५ बाट एमाले अध्यक्ष केपी शर्मा ओलीविरुद्ध उम्मेदवारी दिएका युग पाठकले पुतली चिन्ह पाएका छन् ।

तनहुँ १ मा स्वतन्त्र उम्मेदवारी दिएका नेपाली कांग्रेसका पूर्व नेता गोविन्दराज जोशीले कैंची चुनाव चिह्न पाएका छन् । यसअघि स्थानीय तहको चुनावमा व्यास नगरपालिकाको मेयर उठेका जोशीका छोरा दीपकले कैंची चुनाब चिन्ह पाएका थिए ।

चितवन–३ को प्रतिनिधिसभाका स्वतन्त्र उम्मेदवार जगन्नाथ पौडेलले ‘सूर्यमुखी फूल’ चुनाव चिन्ह पाएका छन् । निर्वाचन कार्यालयले स्वतन्त्र उम्मेदवारी  पौडेललाई उक्त चुनाव चिन्ह दिएको हो । पौडेलले यसअघि स्थानीय तहकाे चुनावमा भुइँकटहर चिन्ह पाएका थिए।