हामी सबैकाे संसारन्यूज

मुरारीराज मिश्र, काठमाडौं

१
के स्वाभिमान भन्दा ठूलो पद हुन्छ !
के पद पाए मात्रै ठूलो कद हुन्छ !
गिरेर तलुवै नचाटौं न हजुर
चाकडीको पनि त यौटा हद हुन्छ ।

२
समयसंगै कहिले अनायासै हैसियत चुलिन्छ,
अहंकार गर्नु व्यर्थ छ कहिले नराम्ररी थलिन्छ,
सबैभन्दा माथि छु भनेर, घमण्ड गर्ने छत पनि
घरको तला थपिएपछि स्वतः भुइँमा बदलिन्छ ।

३
नाङ्गिदैंछन् बिस्तारै मानिसका चरित्रहरु
अनौठा देखिन थाले मित्रताका चित्रहरु
फाइदाका लागि कहिले यता कहिले उता
सूर्यमुखी फूलजस्तै लाग्न थाले मित्रहरू ।

४
महंगियो तरकारी, दूध, फलफूल र अन्न
जनताको पेट संधै आधा, कहिल्यै छैन टन्न
कालाबजारिया सक्रिय छन् मौन छ सरकार
कसले सुन्छ र यो व्यथा ? खै कता जाने हो भन्न !

५
कहिले भन्छन्, ‘यो त मेरो नजिकैको नाता पर्ने’
कहिले, ‘गोरु बेचेको साइनो’ भन्दै आँखा तर्ने
स्वार्थ पूरा नहुन्जेल आफ्नो, नत्र बिरानो भनी
सम्बन्ध चिनाउनेलाई खै के सम्वोधन गर्ने ?