हामी सबैकाे संसारन्यूज

काठमाडौं । कारोबारमा रहेका अधिकांश वाणिज्य बैंकहरुको दोस्रो बजार (नेप्से)मा उपस्थिति निकै कमजोर देखिएको छ । मुनाफामा अगाडि नै रहेका र बलिया मानिएका वाणिज्य बैंकहरु पनि दोस्रो बजारमा निकै कमजोर स्थितिमा देखिएका हुन् ।

कारोबारमा रहेका २५ वाणिज्य बैंकमध्ये आधा जसो वाणिज्य बैंकहरुको दोस्रो बजारमा कारोबार निकै अत्यासलाग्दो छ । ठूला र बलिया मानिएका ग्लोबल आइएमई, प्रभू बैंक, मेघा बैंक जस्ता संस्थाहरुको शेयर मूल्य पनि प्रतिकित्ता २ सयभन्दा मुनि छ ।

सोमबार कारोबार चलिरहँदा २५ वाणिज्य बैंकमध्ये १० वाणिज्य बैंकको शेयर मूल्य २ सयभन्दा मुनि छ । त्यस्तै, ८ वाणिज्य बैंकको शेयर मूल्य ३ सयभन्दा मुनि छ ।

नबिल बैंक, एनआईसी एसिया र एभेरष्ट बैंकको मूल्य केही माथि भएपनि अन्य बैंकहरुको मूल्य भने ४ सयको आसपासमा छ ।]

किन छैन बैंकहरुप्रति आकर्षण ?

शेयर मूल्य निकै कममा कारोबार भए पनि अधिकांश वाणिज्य बैंकहरुको वित्तिय स्थिति बलियो छ । गत आर्थिक वर्षको मुनाफाको आधारमा लाभांश घोषणा गरेका अधिकांश बैंकहरुले लगानीकर्तालाई लोभ्याउने खालकै लाभांश दिएका छन् । केही बैंकको लाभांश निकै आकर्षक पनि छ ।

तर, दोस्रो बजारमा लगानीकर्ताभन्दा कारोवारीहरु हावी हुँदा आधारभुतरुपमा निकै कमजोर कम्पनीहरुको शेयर मूल्य माथि छ भने बलिया संस्थाहरु तल परेका छन् । तर, नयाँ लगानीकर्तालाई भने यस्ता शेयरमा लगानी गर्दा जोखिम निकै कम हुने गर्दछ । आर्थिक विश्लेषक वाणिज्य बैंकहरुमा लगानी गर्ने उत्तम समय भएको बताउँछन् ।