Sansar News
काठमाडौं । नेपाली कांग्रेसको संसदीय दलको नेता चयनका लागि आज मनोनय दर्ता हुने भएको छ ।
दलको नेता चयनका लागि भोली बुधबार हुने निर्वाचनका लागि आज ८ देखि १० बजेसम्म मनोनय दर्ता, ११ बजेसम्ममा उम्मेदवारको दरखास्त उपर दावी विरोध र दिउँसो ३ बजेभित्रमा उम्मेदवारको अन्तिम प्रकाशन गरिने बताइएको छ । साथै उम्मेदवारका लागि दरखास्त शुल्क ५१ हजार तोकिएको छ ।
भोली बिहान ८ देखि १० बजेसम्म नेता चयनका लागि मतदान हुनेछ । पार्टीले निर्वाचन कार्यक्रम प्रकाशित स्थान, मिति र समयभित्र मतदान क्षेत्रमा प्रवेश गरी लाइन लाग्न पनि मतदातालाई आग्रह गरेको छ ।
संसदीय दलको नेताका लागि अहिलेसम्म पार्टीका सभापति शेरबहादुर देउवा, वरिष्ठ नेता रामचन्द्र पौडेल, महामन्त्री गगन थापा र डा. शेखर कोइराला दावेदार देखिएका छन् भने डा कोइराला र थापाबीच साझा उम्मेदवार बनाउने विषयमा छलफल भइरहेको छ ।
मंसीर ४ गते सम्पन्न निर्वाचनमा नेपाली कांग्रेसले प्रत्यक्ष तर्फ ५७ र समानुपातिक तर्फ ३२ सिट गरी जम्मा ८९ सिट प्राप्त गरेको छ । ती ८९ जनाले बुधबार मतदान मार्फत् संसदीय दलको नेता चयन गर्नेछन् । त्यसरी निर्वाचित दलका नेता प्रधानमन्त्रीको दावेदार बन्न पाउनेछन् ।
वि.सं.२०७९ पुस ५ मंगलवार ०९:३२ मा प्रकाशित
