हामी सबैकाे संसारन्यूज

बलराम लम्साल (समीप),बुटवल

१
यात्रै यात्रा रहेछ जीवन बुझ्न थालेको छु।
सम्हालेर आफ्नो मन बुझ्न थालेको छु।
यो संसार अनि तमाम मानिसहरूलाई,
झन पछि अझै झन बुझ्न थालेको छु ।

२
आफ्नो हेर्ने नजर सबैले फेरौं त एकपटक ।
सबै मिलेर सिंहदरवार घेरौं त एकपटक ।
गोैमाता भनेर हामीले जसलाई पुज्ने गर्छाैं,
तिनै गौमाताको दुर्दशा हेरोैं त एकपटक ।

३
शङ्का छैन, छैन दुईमत, तिमी भित्रै छ।
लेखेर राख शत–प्रतिशत, तिमी भित्रै छ।
एक–दुई ठक्कर खाँदैमा हार नखाऊ तिमी,
संसार जित्न सक्ने तागत, तिमीभित्रै छ ।

४
तिमी गएदेखी पटक्कै आश छैन हेर ।
खुसि छेउ कि कहाँ, तलास छैन हेर ।
बा–आमाको मुख हेरेर, म बाँचेको छु,
हुनुपर्ने जिन्दगीमा मिठास छैन हेर ।

५
हुँदा पनि यो मनमा शोक, हाँसेर भनिदिएँ।
गर्दिन तिम्रो जिवनमा रोकटोक, हाँसेर भनिदिएँ।
खुसि हुनु जिन्दगीमा उनले भन्दा खेरि,
तिम्रो खुशी नै मेरो सबथोक, हाँसेर भनिदिएँ।