हामी सबैकाे संसारन्यूज

काठमाडौं । सत्ता गठबन्धनमा किचलो भइरहेका बेला प्रधानमन्त्री पुष्पकमल दाहाल प्रचण्ड पुरानै साझेदार दलहरुलाई सरकारमा ल्याउने प्रयास गरेका छन् । प्रचण्डले जनता समाजवादी पार्टी (जसपा) र नेकपा (एकीकृत समाजवादी)लाई तत्कालै सरकारमा सहभागि गराउने गरी तयारी थालेको बुझिएको छ ।

प्रचण्डले जसको लागि विश्वास पात्रमार्फत छलफल चलाइरहेको माओवादीका एक स्थायी समिति सदस्यले बताएका छन् । बताइएअनुसार एक/दुई दिनभित्रै टुंग्याउने गरी प्रचण्डले छलफल सुरु गरेका छन् ।

प्रचण्डले सरकार गठनको केही दिनमै जसपा अध्यक्ष उपेन्द्र यादव र एकीकृत समाजवादीका अध्यक्ष माधवकुमार नेपालसँग हात्तिवनमा छलफल गरेका थिए । तत्कालिन समय एमाले अध्यक्ष केपी शर्मा ओलीको तिव्र असन्तुष्टिपछि प्रचण्ड पछि हटेका थिए ।

तर, नेपाली कांग्रेससहितका दलहरुले विश्वासको मत दिएपछि उत्साहित बनेका प्रचण्ड पुनः पुरानै साझेदार दलहरुलाई समेट्ने प्रयासमा लागेका हुन् । राष्ट्रिय स्वतन्त्र पार्टी बाहिरिएपछि रिक्त मन्त्रालयमा प्रचण्डले जसपा र एसलाई समेट्न खोजेका हुन् ।

एमाले अध्यक्ष ओलीले रास्वपा र राप्रपालाई लिएर सत्ता गठबन्धनभित्र बेग्लै गठबन्धनको अभ्यास गरेका थिए । उनले दुई दलको बलमा प्रचण्डलाई थप अंकुशमा राखेका थिए । तर, पछिल्लो घटनाक्रमबाट बलिया देखिएका प्रचण्डले पछिल्लो प्रयास थालेका हुन् । उनले ओलीको दबाबलाई पनि वेवास्ता गर्दै जसपा र एसलाई सरकारमा ल्याउने तयारी गरेको बुझिएको छ ।

बताइएअनुसार प्रचण्डको तयारी पुरानै गठबन्धन ब्यूँताउनेमा पनि केन्द्रीत छ ।