हामी सबैकाे संसारन्यूज

बाबुराम न्यौपाने “उत्स“, दमक, झापा

जहाँसम्म चुलिन्छ
तेरो
शक्ति र सम्पन्नताको शिखर
जताततै भेटिन्छन्
पुष्पपथ सजाउदै
हात जोड्ने र गला मिलाउने
भक्तका ताँतीहरु
पागल भएर लाग्छ
सारा संसार तेरोपछि ।

हेक्का रहोस् मान्छे
जब थाल्छन्
अस्ताउन
शक्ति र सम्पन्नताका
तेजिला सूर्य
चिसिन थाल्छ
जीवनको रापिलो राप
जहाँ खस्छ
तेरो थाप्लोमा
दुःख र शोकको पहाड ।

अनि
निर्मम कोलाहलभित्र
निस्वार्थ
एकथोपा आँसु पुछ्ने हत्केला
कतै भेट्ने छैनस् ।

तेरोपछि लाग्ने भीड
अन्तै गुलामीमा व्यस्त रहनेछ
टेकेर काँडालुपथ
एक्लै बगाउँने छस्
एकान्त कुनामा
पीडाका नुनिला
अविरल अश्रुधारा ।

मात्र तेरो
आत्मबल र आत्मविश्वास
धैर्यको अग्निपरीक्षा लिनेछ ।