हामी सबैकाे संसारन्यूज

शिव अधिकारी “इलामे जेठो“,इलाम

१.
हिमाल, पहाड बोल्दैन, मधेस बोल्दैन ।
विस्थापित भयो भाषा, भेष बोल्दैन ।
सत्तासीनले आफ्ना आफ्नै,डम्फू ठोकेपछि,
धराशायी भयो पूरै, देश बोल्दैन ।

२.
राजनीति संयन्त्र नै,यस्तो चलाउँछन् ।
चलाउँदा चलाउँदै, पूरै गलाउँछ्न् ।
आफ्ना विरुद्धमा कोही, बोल्ने आँट गरे,
मौका पर्नासाथ यहाँ, जिउँदै जलाउँछन् ।

३
जति गरुन् ओहोरदोहोर, तर सुध्रिदैनन् ।
यस्तै गरे परार पोहोर, तर सुध्रिदैनन् ।
चण्ड मुण्ड भई गर्छन्, द्वन्द्व जनतामाथि,
छ्याप्दै फोहोर माथि फोहोर, तर सुध्रिदैनन् ।

४
मेरो घर डाँडापरि, तिम्रो ओरी भयो ।
आगो, पानी ल्याउने निउमा, ओहोरीदोहोरी भयो ।
के भएर होला कुन्नि, फुत्तै तिमीबाट,
थाहै नदिई कहिले मेरो, मन चोरी भयो ।

५
सुन्नुहोस् न इष्टमित्र, कुहेको नि हुनसक्छ ।
किन खोल्नु अहिले छिद्र ? कुहेको नि हुनसक्छ ।
बारीभरि पँहेलपुर, फर्सी पाके पनि,
के जान्नु र भित्र शिघ्र, कुहेको नि हुनसक्छ ।