हामी सबैकाे संसारन्यूज

काठमाडौं । लुम्बिनी प्रदेशका मुख्यमन्त्री लिला गिरीले राजीनामा नदिँदै नेपाली कांग्रेसले नयाँ सरकार गठनका लागि दाबी पेश गरेको छ । आइतबार कांग्रेसले माओवादी केन्द्रसहित आठ दलको समर्थनमा दाबी पेश गरेको हो ।

कांग्रेस प्रदेश संसदीय दलका नेता डिल्ली बहादुर चौधरीलाई मुख्यमन्त्रीमा नियुक्त गर्न भन्दै कांग्रेससहित आठ दलको समर्थनमा दाबी पेश गरिएको छ । तर, दाबी पेश गरिएको पत्रमा हस्ताक्षर गरेका नागरिक उन्मुक्ति, जनता समाजवादी पार्टी र जनमत पार्टीले सरकारलाई दिएको समर्थन भने फिर्ता लिइसकेका छैनन् । दाबी पत्रमा हस्ताक्षर गर्ने कतिपय दलका सांसद मन्त्रीकै रुपमा बहाल छन् ।

माओवादी केन्द्रका मन्त्रीले राजीनामा दिएलगत्तै कांग्रेसको नेतृत्वमा नयाँ सरकार गठनका लागि दाबी पेश भएको हो । दलहरुले संविधानको धारा १६८(२) बमोजिम सरकार गठनका लागि दाबी पेश गरेका छन् ।

संवैधानिक व्यवस्थाअनुसार सरकारमा सहभागि कुनै दलले छाडेमा वा सरकार अल्पमतमा परेमा सरकारले ३० दिनभित्र विश्वासको मत लिनुपर्छ । तर, लुम्बिनीमा मुख्यमन्त्रीलाई विश्वासको मत लिने अवस्था नै नगराई दलहरुले नयाँ सरकार गठनका लागि दाबी पेश गरेका छन् ।

८७ सदस्यीय प्रदेशसभामा एमालेसँग एकलरुपमा २९ सांसद छ । गिरीलाई बहुमत सिद्ध गर्न थप १५ सांसदको आवश्यकता पर्दछ ।