हामी सबैकाे संसारन्यूज

काठमाडौं । उपप्रधान तथा रक्षामन्त्री पुर्ण बहादुर खड्काले सुर्खेत विमानस्थलमा उत्रनासाथ त्यहाँको माटो ढोगेका छन् ।

उपप्रधान तथा रक्षामन्त्री भएपछि पहिलोपटक गृहजिल्लामा आयोजित विभिन्न कार्यक्रममा भागलिन सुर्खेत पुगेका उपप्रधानमन्त्री खड्काले बुद्ध एयरको विमानबाट उत्रनासाथ त्यहाँको माटोलाई ढोगेका हुन् ।

चार हातखुट्टाले टेकेर माटोलाई ढोगेका उपप्रधानमन्त्री खड्काले आफुले कर्णालीको शिर निहुरिने गरी कुनैपनि काम आफुबाट नहुने समेत बताएका छन् ।

विमानस्थलमै आयोजित पत्रकार सम्मेलनमा खड्काले आफु अहिले जहाँ रहेपनि कर्णालीको जनप्रतिनिधि रहेको बताउँदै कर्णालीको माटोसँग आर्शिवाद र शुभकामना माग्नका लागि माटो ढोगेको बताए ।

नेपाली कांग्रेसका उपसभापति समेत रहेका उपप्रधामन्त्री खड्काले विमानस्थलको भुँईमा निहुरिएर ढोगेको तस्बिर अहिले सामाजिक संजालमा चर्चामा आएको छ । केहीले देशभक्ति पूण भाव भनेका छन् भने केहीले भुँइ ढोग्नुभन्दा कर्णालीका जनताको घर–घरमा पुगेर उनीहरुको जीवनस्तर कसरी माथि उकास्न सकिन्छ भन्ने प्रण गरेर त्यसमा लागेमा कर्णालीले ठूलो आर्शिवाद दिने टिप्पणी गरेका छन् ।