हामी सबैकाे संसारन्यूज

काठमाडाैं । नेपाल बार एसोसिएसनले प्रधानन्यायाधीश नियुक्ति प्रक्रिया अघि बढाउन माग गरेकाे छ । बुधबार पत्रकार सम्मेलन आयोजना गर्दै बारले तत्कालै नियुक्ति प्रक्रिया अगाडि बढाउन माग गरेकाे हाे ।

बारका अध्यक्ष गोपालकृष्ण घिमिरेले सातदेखि दश दिनभित्र प्रधानन्यायाधीश नियुक्त प्रक्रिया अघि नबढे बार आन्दाेलनमा उत्रिने बताए । “लामो समयदेखि प्रधानन्यायाधीशको पद रिक्त छ, उच्च र जिल्लामा धेरै न्यायाधीशको पद रिक्त छ”, अध्यक्ष घिमिरेले भन्नुभयो, “सातदेखि १० दिनभित्र नियुक्तको प्रक्रिया अघि बढाउन आग्रह गर्छु । यदि त्यसाे नभए बार आन्दाेलनमा उत्रिन्छ ।”

उनले प्रधानमन्त्री, सभामुखलगायतको पटक–पटक ध्यानाकर्षण गराउँदा पनि प्रधानन्यायाधीश नियुक्ति नगरेर न्यायपालिकालाई लामो समय नेतृत्वविहीन बनाइएकोप्रति सैह्य नभएको बताए । प्रधानन्यायाधीश छिटो नियुक्तीबारे ध्यानाकर्षण गराउन बिहीबार प्रधानमन्त्री पुष्पकमल दाहाल ‘प्रचण्ड’लाई भेट्ने र आफूहरुले दिएको समयसीमाबारे जानकारी गराउने समेत उनकाे भनाइ छ ।

उनले न्यायापालिकाको भ्रष्टाचार, विकृति–विसङ्गति अन्त्य गर्नका लागि तत्कालीन न्यायाधीश हरिकृष्ण कार्कीको प्रतिवेदन कार्यान्वयन गर्नसमेत माग गरे । प्रधानन्यायाधीशसहित सर्वोच्च अदालतमा पाँच, उच्च अदालतमा ५० र जिल्ला अदालत चार न्यायाधीश पद रिक्त रहेको उनले जानकारी दिएका छन् ।

पत्रकार सम्मेलनमा बाेल्दै सर्वोच्च बार एसोसिएसनका अध्यक्ष हरिशंकर निरौलाले प्रधानन्यायाधीश नियुक्ति प्रक्रिया ढिलाइ हुँदा समग्र न्यायापालिकामा असर परेको बताए । उनले अबकाे ढिलाइ सह्य नहुने स्पष्ट पारे ।

बारले न्यायपालिकाको विकृति, विसङ्गतिको अन्त्य सम्बन्धमा, पेसी व्यवस्थापन पूर्ण स्वचालित प्रणालीद्वारा गर्ने, पूर्वप्रधानन्यायाधीशउपरको विचाराधीन महाभियोग प्रस्तावलाई अन्तिम किनारा लगाउने र न्यायाधीश नियुक्ति मापदण्ड खारेज गरी सल्लाह सुझावमा वैज्ञानिक पद्धति अपनाउन माग गरेको छ ।