हामी सबैकाे संसारन्यूज

काठमाडौं । बैंक तथा वित्तीय संस्थाहरुले ब्याजदर घटाउने निर्णय गर्दा सेयर बजार प्रभावित बनेको छ । लामो समयदेखि सुस्ताएको सेयर बजारमा उत्साह छाएको छ ।

बुधबारमात्रै बैंक तथा वित्तीय संस्थाहरुले मुद्दती निक्षेपको ब्याजदर घटाउने निर्णय गरेका थिए । वाणिज्य बैंकहरुले ब्याजदर घटाएर एकल अंकमा झार्ने निर्णय गर्दा फाइनान्सहरुले पनि ०.२० प्रतिशत बिन्दुले घटाउने निर्णय गरेका छन् । जसको सिधा प्रभाव सेयर बजारमा देखिएको छ ।

बुधबार ९२ अंकले बढ्दै बजार १९६३ अंकमा पुगेको छ । बुधबार कारोबार रकम अघिल्लो दिनको तुलनामा दोब्बर भएको छ । बाुधबार कारोबार रकम एक अर्ब ९७ करोड रुपैयाँ बराबरको भएको छ । यसअघि मंगलबार ९४ करोड रुपैयाँ बराबरको कारोबार भएको थियो ।

सबै उपसमूहका सूचक बढेका छन् । बैंकिङ ६६, विकास बैंक १९७, फाइनान्स १०८, होटल तथा पर्यटन ११८, जलविद्युत् १२०, जीवन बीमा ४४२, उत्पादन २१८, माइक्रोफाइनान्स १७२, निर्जीवन बीमा ३४३, अन्य ४७ र ब्यापार उपसमूह ८४ अंक बढे ।

आदर्श लघुवित्त, खप्तड लघुवित्त, कालिन्चोक दर्शन र गणपति लघुवित्तको मूल्य १० प्रतिशत बढ्यो । बलेफी हाइड्रो, सबैको लघुवित्त, सयपत्री हाइड्रोपावर, खानीखोला हाइड्रोपावर, जानाकी फाइनान्स, रिभरफल्स पावर, आशा लघुवित्त, युनियन हाइड्रोपावर र विजय लघुवित्तको मूल्य ९ प्रतिशतभन्दा धेरै बढ्यो ।

कारोबार रकमका आधारमा शिवम् सिमेन्ट्स शीर्ष स्थानमा रह्यो । शिवम् सिमेन्ट्स ११ करोड ७१ लाख रुपैयाँ बराबरको शेयर खरिदबिक्री भएको छ।

त्यस्तै, यस दिन एनआईसी एशिया र हिमालयन डिष्टिलरीको ६ करोडभन्दा बढीको शेयर कारोबार भएको छ।