हामी सबैकाे संसारन्यूज

काठमाडौं । चालु आर्थिक वर्षको नौ महिनामा अधिकांश विकास बैंकहरुको नाफा घटेको छ । चैत मसान्तसम्मको वित्तीय विवरण सार्वजनिक गरेका ११ बैंकमध्ये नौ बैंकको नाफा घटेको हो ।
यो अवधिमा सबैभन्दा बढी ज्योति विकास बैंकको नाफा घटेको छ । सार्वजनिक वित्तीय विवरणअनुसार अघिल्लो आर्थिक वर्षको नौ महिनाको तुलनामा चालु आर्थिक वर्षको नौ महिनामा ६०.९० प्रतिशतले नाफामा गिरावट आएको छ ।

ज्योति विकास बैंकले नौ महिनामा २० करोड १६ नाफा कमाएको छ तर, गत आर्थिक वर्षको यही अवधिमा बैंकले ५१ करोड ५७ लाख नाफा कमाएको थियो ।

सबैभन्दा बढी नाफा घट्नेमा ज्योतिपछि महालक्ष्मी विकास बैंक छ । अघिल्लो आर्थिक वर्षको तुलनामा महालक्ष्मी विकास बैंकको ४६.९४ प्रतिशतले नाफा घटेको छ । चालु आर्थिक वर्षको नौ महिनामा महालक्ष्मीले ३७ करोड ८९ लाख नाफा कमाएको छ तर, अघिल्लो आर्थिक वर्षको यही अवधिमा महालक्ष्मीले ७१ करोड ४२ लाख नाफा कमाएको थियो ।

यस्तै, कामना सेवा विकास बैंकको नाफामा ३९.४१ प्रतिशतले गिरावट आएको छ । बैंकले नौ महिनाको अवधिमा ३० करोड ५६ लाख रुपैयाँ नाफा कमाएको छ । तर, बैंकले अघिल्लो आर्थिक वर्षको यही अवधिमा ५० करोड ४५ लाख नाफा कमाएको थियो ।

नाफाका हिसाबले सबैभन्दा बढी नाफा आर्जन गर्ने मुक्तिनाथ विकास बैंक र गरिमा विकास बैंकको नाफामा पनि यस अवधिमा गिरावट आएको छ । मुक्तिनाथको नाफा २१ प्रतिशतले गिरावट आएको छ भने गरिमाको नाफामा १६.९२ प्रतिशतले गिरावट आएको छ । तथापी, सबैभन्दा बढी नाफा कमाउने विकास बैंकमा मुक्तिनाथ र गरिमा नै परेका छन् । नौ महिनाको अवधिमा गरिमाले ८० करोड ६२ लाख नाफा आर्जन गरेको छ भने गरिमाले ६५ करोड १८ लाख नाफा आर्जन गरेको छ । दुवै बैंकले अघिल्लो आर्थिक वर्षको यही अवधिमा क्रमशः एक अर्ब दुई लाख र ७८ करोड ४६ लाख नाफा आर्जन गरेका थिए ।

अधिकांश विकास बैंकहरुको नाफा घट्दा पनि तीन वटा बैंक कर्पोरेट डेभलपमेन्ट बैंक, शाइन रेसुङ्गा डेभलपमेन्ट बैंक, ग्रीन डेभलपमेन्ट बैंकको नाफा भने बढेको छ । तीन बैंकमध्ये प्रतिशतका हिसाबले कर्पोरेट डेभलपमेन्ट बैंकको नाफा सबैभन्दा बढी दरले बढेको छ । कर्पोरेट डेभलपमेन्ट बैंकको नाफामा ७३.२९ प्रतिशतले बृद्धि भएको छ भने साइन रेसुङ्गा र ग्रीन डेभलपमेन्ट बैंकको नाफामा क्रमशः १४.३८ र ८.५१ प्रतिशतले बृद्धि भएको छ ।

चालु आर्थिक वर्षको नौ महिनाको अवधिमा कर्पोरेट डेभलपमेन्ट बैंकले एक करोड ३० लाख, साइन रेसुङ्गाले ५५ करोड ४५ लाख र ग्रीन डेभलपमेन्ट बैंकले एक करोड तीन लाख रुपैयाँ नाफा आर्जन गरेका छन् ।

कुनको नाफा कति ?