Sansar News
केशव ज्ञवाली ’आगत’
रुरुक्षेत्र, गुल्मी
हाल–सूर्यविनायक, भक्तपुर
राजनीतिको चर्को आवाज
जता गयो उतै ठोक्किन्छ
मन्दिरमा घन्टी पनि
बज्नुसम्म बजेका छन् र
चोकचोकमा
विश्व विद्यालय पनि
बोल्नुसम्म बोलिरहेका छन्
तैपनि
देख्ने आँखा र
सुन्ने कान कतै भेटिँदैनन् ।
भ्रष्टाचार,युध्द र
विभेदका
उच्छृङ्खल श्रृङ्खलाहरू
बेहिसाब लामबध्द छन् सामुन्नेमै
तैपनि
किन मौन छ आफ्नै आवाज ?
सोच्दासोच्दै ध्यानमा
सक्छौ त आफूलाई चिन्न
अनन्त युगबोध र
रुपान्तरणका लागि
समय
तिम्रो आवाज पर्खिरहेको छ ।
.
वि.सं.२०८० वैशाख ३० शनिवार ०७:४१ मा प्रकाशित
