Sansar News
काठमाडौं । साताको अन्तिम कारोबार दिन बिहीबार सेयर बजारमा झिनो अंकको बृद्धि भएको छ । बिहीबार पाँच अंकले बजार बढ्दै सेयर बजार २०४२.०७ को बिन्दुमा पुगेको छ ।
बजार बढेको भएपनि यसअघिको तुलनामा बिहीबार कारोबार रकम भने घट्न पुग्यो । बिहीबार ७८ लाख ९६ हजार ४७८ कित्ताको किनबेच हुँदा कारोबार रकम तीन अर्ब १६ करोड २८ लाख रुपैयाँमा मात्रै सीमित रह्यो । यसअघि बुधबार कारोबार रकम पाँच अर्ब एक करोड बढी थियो ।
बजार बढेको भएपनि बिहीबार अधिकांश उपसमूहको मूल्यमा भने गिरावट आएको छ । कारोबार भएका २२३ कम्पनीमध्ये १३९ कम्पनीको मूल्य घटेको छ भने ७५ कम्पनीको मूल्य बढेको छ । बिहीबार नौ कम्पनीको मूल्य भने स्थिर रह्यो ।
यसअघिका दिनमा जस्तै बिहीबार पनि सिवम सिमेन्टको कारोबार रकम सबैभन्दा बढी रह्यो । शिवमसँगै सोल्टी होटल लिमिटेड, नेपाल लाइफ इन्स्युरेन्स, आइएमइ जनरल इन्स्युरेनसलगायतको कारोबार रकम उच्च रह्यो ।
साताको अन्तिम कारोबार दिन सिटि होटल र अभियान लघुवित्तको मूल्यमा नौ प्रतिशतभन्दा बढीको बृद्धि भएको छ ।
वि.सं.२०८० जेठ ३२ बिहीवार १५:२१ मा प्रकाशित
