Sansar News
काठमाडौं । समाजवादी मोर्चा गठनसँगै नेकपा (माओवादी केन्द्र) र नेपाल कम्युनिष्ट पार्टीबीच पार्टी एकता टुंग्याउने गरी छलफल सुरु भएको छ । बिहीबार प्रधानमन्त्रीसमेत रहेका माओवादी केन्द्रका अध्यक्ष पुष्पकमल दाहाल ‘प्रचण्ड’ र नेकपाका महासचिव नेत्रविक्रम चन्द ‘विप्लव’बीच एकतालाई टुंग्याउने गरी छलफलमा जुटेका थिए ।
प्रचण्डका प्रेस सल्लाहकार मनहरि तिमिल्सनाले जानकारी दिएअनुुसार बिहीबार प्रधानमन्त्री निवास बालुवाटारमा दुई नेताबीच एकतालाई छिट्टै टुंग्याउने गरी छलफल भएको छ । छलफल निकै सकारात्मक भएको उनले बताए ।
माओवादी केन्द्रका उपाध्यक्ष कृष्णबहादुर महरा पूर्वमाओवादीहरुबीच एकता गर्ने पहलमा छन् । उनले विप्लवलाई माओवादी केन्द्रमा भित्र्याउनका निम्ति लामै समयदेखि छलफल गर्दै आएका थिए । महराको मध्यस्तकर्तापछि प्रचण्ड र विप्लव एक्लाएक्लै छलफलमा जुटेका हुन् ।
बताइएअनुसार विप्लवलाई पार्टी महासचिवको जिम्मेवारीसमेत दिएर भित्र्याउने तयारी भएको छ । पार्टी एकताका विषयमा सहमत भएका दुई पार्टीबीच नेताहरुको व्यवस्थापनको विषय मात्रै टुंग्याउन बाँकी छ ।
वि.सं.२०८० असार ७ बिहीवार १३:२२ मा प्रकाशित
