हामी सबैकाे संसारन्यूज

काठमाडौं । प्रधानमन्त्री पुष्पकमल दाहाल ‘प्रचण्ड’को अभिव्यक्तिको विषयलाई लिएर विपक्षी मोर्चामा विभाजन देखिएको छ । प्रमुख प्रतिपक्षी एमाले र विपक्षी दल राष्ट्रिय प्रजातन्त्र पार्टी (राप्रपा)ले राजीनामाको अडान लिइरहँदा सँगै देखिएको राष्ट्रिय स्वतन्त्र पार्टी (रास्वपा)ले भने उक्त अडान छाडेको छ । रास्वपाले प्रधानमन्त्रीले राजीनामा होइन स्पष्टीकरण दिनुपर्ने माग गरेको छ ।

रास्वपाले आफ्नो पार्टी प्रधानमन्त्रीको राजीनामा माग गर्ने पक्षमा नरहेको स्पष्ट पारेको छ । “हामीले प्रधानमन्त्रीको राजीनामा होइन, स्पष्टीकरण माग गरेका छौं”, रास्वपाका प्रमुख सचेतक सन्तोष परियारले भनेका छन्, “उहाँको अभिव्यक्ति आपत्तिजनक छ, संविधानलाई अवमूल्यन गरिएको छ, यसबारे उहाँले जवाफ दिनुपर्छ ।”

प्रधानमन्त्रीको अभिव्यक्तिलाई लिएर यसअघि बुधबारको संसद बैठक अवरुद्ध पारिएको थियो । उक्त बैठकमा आफूहरुले बोल्न नपाएको परियारले बताए ।

सभामुख देवराज घिमिरेले प्रधानमन्त्रीलाई जवाफ दिन लगाएर संसद खुलाउने गरी तयारी गरेका छन् । तर, एमाले त्यसमा सहमत छैन । एमालेले प्रधानमन्त्रीको राजीनामालाई बटमलाइन बनाएको छ ।

एमालेका प्रमुख सचेतक महेश बर्तौला राजीनामा नआएसम्म संसद अगाडि नबढ्ने बताउँछन् । “हाम्रो बटमलाइन यथावत छ, प्रधानमन्त्रीको राजीनामा नआएसम्म सदन अगाडि बढ्दैन”, बर्तौलाले भनेका छन् ।

तर, राजीनामाको अडानमा एमाले र राप्रपा मात्रै देखिँदा विपक्षी मोर्चा कमजोर बनेको छ भने एजेण्डा पनि कमजोर बनेको छ । यदि राप्रपा पनि राजीनामाको अडानबाट बाहिरिएमा संसदमा एमाले मात्रै उक्त अडानको पक्षमा देखिनेछ । जसले सत्तापक्षलाई सहज बन्ने पनि देखिएको छ ।

सत्तापक्षबीच यसअघि नै प्रधानमन्त्रीले जवाफ दिएर संसद बैठकलाई अगाडि बढाउने निर्णय गरेको थियो । सत्ता पक्षले ‘राजीनामाको विषय कल्पना पनि गर्न नसक्ने’ जनाएको छ । सत्तापक्ष जसरी पनि अगाडि बढ्ने लाइनमा हुनु र विपक्षी मोर्चा विभाजित हुँदा एमालेले अगाडि सारेको अडान अर्थहिन हुने देखिन्छ ।