Sansar News
काठमाडौं । साताको अन्तिम कारोबार दिन दोहोरो अंकले घट्दै सेयर बजार बन्द भएको छ । बिहीबार १२.६२ अंकले घट्दै बजार २०८४.९३ बिन्दुमा झरेको छ ।
बिहीबार सेयर बजार सूचांक ओरालो लागेपनि कारोबार रकम भने उच्च रह्यो । बिहीबार ९३ लाख ८२ हजार कित्ता सेयर किनबेच हुँदा कारोबार रकम तीन अर्ब ३९ करोड ६६ लाख पुग्यो । जुन केही दिन यताकै उच्च हो ।
घटेको बजारमा बैंक, होटल र सामूहिक लगानी समूहबाहेकका समूह राताम्मे बने । सबैभन्दा बढी जीवन बीमा र निर्जिबन बीमा समूहमा गिरावट आयो । जीवन बीमा समूहमा १३५ अंकले गिरावट आयो भने निर्जिबन बीमा समूहमा ११३ अंकले गिरावट आयो ।
वाणिज्य बैंकतर्फ केही राहतको अनुभूति गर्दा विकास बैंक, फाइनान्स समूहमा भने उच्च अंकको गिरावट आयो ।
पिपुल्स हाइड्रो, हिमालयन पावर, बुद्ध भूमि, रिडि पावरलगायतका कम्पनीको मूल्यमा उच्च अंकले घटेको छ ।
बिहीबार शिबम्, सोल्टी होटेल हिमालयन लाइफ इन्स्योरेन्स, एनटिसी, चिलिमे हाइड्रोलगायतका कम्पनीको कारोबार उच्च भएको थियो । तीन लाख ५७ हजार कित्ता सेयर किनबेच हुँदा शिवम् कम्पनीको कारोबार रकम २३ करोड ७५ लाख बढी भएको छ ।
बैंकर्स संघले बैंकहरुको ब्याजदर बैंक आफैंले तोक्ने सक्ने व्यवस्था गरेसँगै सेयर बजारमा राम्रो प्रभाव पर्ने आशा गरिएको थियो । तर, बैंकर्स संघको निर्णयको नकारात्मक प्रभाव बजारमा देखियो ।
वि.सं.२०८० असार २८ बिहीवार १५:४२ मा प्रकाशित
