Sansar News
काठमाडौं । पछिल्लो वर्षहरुमा वैदेशिक रोजगारीमा जानेको संख्या क्रमशः बढ्न थालेको छ । स्वदेशमा रोजगारीको अवसर कम हुँदै गर्दा युवाहरु बाध्यात्मकरुपमै विदेश भासिएको देखिन्छ ।
कोरोना कालअघिको समयभन्दा कोरोना कालपछि धेरै नेपाली विदेशिएका छन् । आर्थिक वर्ष २०७५/०७६ मा पाँच लाख आठ हजार ८२७ जना नेपाली रोजगारी खोज्दै विदेशिएका थिए । त्यसपछिका तीन वर्ष कोरोना महामारीको कारण संख्यात्मकरुपमा केही कम नेपाली विदेशिए ।
तर, कोरोना कालपछि विदेशिनेको संख्या निकै बढेको छ । आर्थिक वर्ष २०७९/८० सम्म आइपुग्दा सात लाख ७१ हजार ३२७ जना नेपाली रोजगारी खोज्दै विदेशिएका छन् । जुन तथ्यांकअनुसार औसतमा मासिक ६४ हजार २७७ जना नेपाली रोजगारी खोज्दै विदेशिएका छन् ।
सबैभन्दा धेरै मलेसिया
वैदेशिक रोजगारीमा जाने अधिकांश नेपाली विशेषतः खाडी मुलुक नै गएको पाइन्छ । मलेसिया, कतार, दुबई, साउदी अरबजस्ता देशमा नै नेपालीहरु कामको खोजीमा पुगेका छन् ।
वैदेशिक रोजगार विभागको तथ्यांकअनुसार गत एक वर्षको बीचमा मलेसिया मात्रै दुई लाख ५९ हजार ५९४ नेपाली रोजगारीको शिलशिलामा पुगे । जुन यसअघिका वर्षहरुको तुलनामा निक्कै बढी हो ।
यस्तै, कतार एक लाख ३३ हजार २६२, दुबई एक लाख १६ हजार १५९, साउदी अरब एक लाख १२ हजार ७७७ र कुवेत ४३ हजार ५०७ नेपाली रोजगारीको शिलशिलामा गएका छन् ।
कुन महिना कति विदेश गए ?
२०८० असार : ५५ हजार २९९
” ” जेठ : ५९ हजार ४२२
” ” वैशाख : ५४ हजार ४५७
२०७९ चैत : ६१ हजार ४७८
” ” फागुन : ६१ हजार ८४५
” ” माघ : ६४ हजार २८४
” ” पुस : ६५ हजार ४६४
” ” मंसिर : ६८ हजार ५६४
” ” कात्तिक : ७८ हजार ३७०
” ” असोज : ६२ हजार ७०६
” ” भदौ : ७६ हजार ४०३
” ” साउन : ६३ हजार ३९
वि.सं.२०८० साउन १५ सोमवार १२:४७ मा प्रकाशित
