हामी सबैकाे संसारन्यूज

प्रकाश घायल,फुटुङ, काठमाडौं

१.
सामीप्यता छोडेर बिस्तार बिस्तारै दूरी बढ्दै गयो
खै ! कस्तो अचम्म मन चोरीको उजुरी बढ्दै गयो
उभिएको धरातल बिर्सेर दम्भको पर्खाल चढेपछि
मान्छेमा अहंकार घमण्ड झन् चुरिफुरी बढ्दै गयो ।

२.
प्रश्नै प्रश्नको डंगुर मात्रै छ, छैन उत्तर के भन्नु
बेथितिले गाँजेपछि परिहाल्छ असर के भन्नु
हड्डी नै घोटिसक्दा पनि कतै भविष्य नदेखेपछि
भविष्य खोज्न बिदेशीए, छोडे गाउँघर के भन्नु ?

३.
एकान्तमा तिमी रोयौ अनि पो तस्बिर रोयो
गजुर ढल्किए पछि आस्थाको मन्दिर रोयो
मौसम बदलिए पनि तक्दिर बदलिएन अझै
फूलमा वसन्त हाँस्यो सिरेटोले शिशिर रोयो ।

४.
हिउँदको खहरे खोल्सीमा बाँध बाँधेको देखियो
निहित स्वार्थले सिमाना र साँध नाघेको देखियो
सर्बाङ्ग देखियो, बाँकी रहेन केही देख्नलाई अब
झन् भीर लड्ने गाईलाई काँध थापेको देखियो ।

५.
घाम हेरेर बस्नु अनि आकाशको जून हेरेर बस्नु
हेर्नुस् छरिन्छ टुकुचा माथीको बिस्कुन हेरेर बस्नु
कुम्भकर्ण निद्रामा निदाउनु भो यतिञ्जेल सम्म
अब त! काम लाग्दैन हिजोको भनसुन हेरेर बस्नु ।