हामी सबैकाे संसारन्यूज

खोलाघरे साहिंलो,इलाम

१.
मनभरि माया थियो बोल्न सकिएन
प्रतिष्ठाले गर्दा कुरो खोल्न सकिएन
अग्लो मचानबाट तल ओर्लिएर झ्वाम्मै
प्रीतप्रवाहमा बग्दै छिचोल्न सकिएन ।

२.
मलाई पनि तरकारी र तिहुुन उस्तै लाग्छ
सहयोगी भुटुन,मसला र नून उस्तै लाग्छ
भाउबिक्रीको आकाशपाताल अन्तर किन हेर्नू ?
सुन्दाखेरि मात्रै पनि लसुन र सुन उस्तै लाग्छ !

३.
समयले ठगेपछि कसको के लाग्छ ?
खोलो उल्टो बगेपछि कसको के लाग्छ ?
दैव नै हो सुखद संयोग मिलाई दिनेओर्ने
संयोग उसैले लगेपछि कसको के लाग्छ ?

४.
नियन्ताले ठुलो, अग्लो, होचो बनायो
होचालाई मात्रै पिट्ने घोचो बनायो
त्यो अन्यायी नियन्तालाई मुद्दा हाल्नुपर्छ
किन कतै मजबूत, कतै पोचो बनायो ?

५.
मनमा मात्रै खेल्ने ‘माया’ पीर हुँदो रैछ
माया साबित गर्ने टुङ्गो शरीर हुँदो रैछ
पीर मात्रै उठाउने वा टुंगो लगाइदिने
छिनोफानो गर्ने चाहिँ तकदीर हुँदो रैछ ।