हामी सबैकाे संसारन्यूज

गाउँमा लुगा सिलाउने दलबहादुर नेपालीको श्रीमती
वर्षको ४ पाथी धानमा
यो समाजले दमिनी बनाएको थियो ।
तिनीलाई दमिनी नै रहन दिनु पर्ने,
तर माओवादीको समावेशी एजेन्डाले
दलित महिला वडा सदस्य बनायो
त्यसैले माओवादी आतंककारी हो !

जमिनदारको घरमा जुठो भातका निम्ति
कमैया भएर जीवन बिताइरहेकी महिला
यो समाजले थरुनी बनाएको थियो ।
तिनीलाई थरुनी नै रहन दिनुपर्ने,
तर माओवादी समानुपातिक एजेन्डाले
समानुपातिक संसद बनायो
त्यसैले माओवादी हत्यारा हो !

सामन्तहरुले आफ्नो यौन चहाना पूरा गर्न
बनाएको बादी समुदायकी
ती युवतीले सामन्तहरुको
यौन प्यास नै पूरा गर्दिएर बस्नु पर्ने,
तर माओवादी कोटा प्रणाली एजेन्डाले
उनलाई खरिदार र सुब्बा सम्म बनायो
त्यसैले माओवादी आतंककारी हो !

सामन्तहरुले आफ्नो खेत जोत्न
बर्षको ४ पाथि धानमा हली बनाएको ती
जनजातिको छोरा जसलाई
यो समाजले हलि बनाएको थियो ।
उनलाई हली नै रहन दिनु पर्ने,
तर माओवादीकाे समानुपातिक र समावेशी एजेन्डाले
उनलाई मन्त्री सम्म बनायो
त्यसैले माओवादी हत्यारा हो !

मधेसमा जमिन्दारको घरमा
बिहान बेलुकीको खानामा भैंसी चराउने
जसलाई यो समाजले “अहिर” बनाएको थियो ।
उनलाई ‘अहिर” नै रहन दिनु पर्ने,
माओवादी एजेन्डाले गणतन्त्र ल्यायो
र देशको राष्ट्रपति सम्म बनायो ।
त्यसैले माओवादी आतंककारी हो !