हामी सबैकाे संसारन्यूज

काठमाडौं । स्वास्थ्यकर्मीमाथि विरामीका आफन्त तथा परिवारबाट आक्रमणको सिलसिला बढेपछि गृहमन्त्रालयले सर्वसाधारणले देख्ने गरी सबै अस्पतालमा दण्ड सजाय सम्बन्धी सूचना राख्ने भएको छ ।

पोखराको मणिपाल अस्पताल लगायत देशका बिभिन्न अस्पतालमा उपचाररत विरामीको मृत्यु भएपछि आफन्तले चिकित्सकमाथि गरेको आक्रमणविरुद्धमा देशभरीका डाक्टरहरु आन्दोलित भइरहेका बेला बुधबार गृहमन्त्री नारायणकाजी श्रेष्ठ, स्वास्थ्यमन्त्री मोहनबहादुर बस्नेतसहित सरोकारवालाहरुबीच भएको छलफलपछि उक्त निर्णय गरिएको हो ।

‘देशका सबै स्वास्थ्य संस्थाहरुमा ‘स्वास्थ्यकर्मी तथा स्वास्थ्य संस्थाको सुरक्षा सम्बन्धी ऐन, २०६६ (संशोधनसहित)’ ले गरेको कसूर र दण्ड सजायसँग सम्बन्धीत व्यवस्थाहरु उल्लेख भएको सार्वजनिक सूचना सबै नागरिकहरुले सहजै देख्ने गरी राख्ने व्यवस्था स्वास्थ्य तथा जनसंख्या मन्त्रालयले मिलाउने ।’ जारी विज्ञप्तिमा भनिएको छ ।

त्यस्तै पछिल्लो समय देशका विभिन्न स्वास्थ्य संस्थामा कार्यरत स्वास्थ्यकर्मीहरुमाथि भएका दुव्र्यवहारका घटनाहरुमा संलग्न देखिएका दोर्षिहरुलाई ‘स्वास्थ्यकर्मी तथा स्वास्थ्य संस्थाको सुरक्षा सम्बन्धी ऐन, २०६६ (संशोधनसहित)’ बमोजिक कारबाही गर्न मातहतका निकायलाई निर्देशन दिने समेत उक्त विज्ञप्तिमा उल्लेख छ ।