Sansar News
काठमाडौं । सोनापुर मिनरल्स एण्ड ओइल लिमिटेड (सोनापुर सिमेन्ट)ले निष्कासन गरेको आईपीओमा आवेदन दिने म्याद थप भएको छ । कम्पनीले म्याद थप गर्दै असोज २८ गतेसम्म आईपीओ बिक्री खुला राख्ने निर्णय गरेको हो ।
यद्यपि सो मिति अगावै पूर्ण आवेदन परेमा सार्वजनिक सूचना जारी गरेर त्यस अगाडी नै आईपीओ बिक्री बन्द गरिने कम्पनीले जनाएको छ । कम्पनीको शेयर निष्कासनको लागि एनआईएमबि एस क्यापिटल बिक्री प्रबन्धक रहेको छ ।
कम्पनीको आईपीओमा असोज १६ गतेसम्म ७ लाख ३२ हजार बढीले आवेदन दिएका छन् । मंगलबार साँझ ५ बजेसम्ममा कम्पनीको आईपीओमा ७ लाख ३२ हजार ९ सय ५३ जना आवेदकले ८५ लाख ६६ हजार ८ सय ४० कित्ताका लागि २ अर्ब ३ करोड ५३ लाख ९ हजार ८ सय ४७ रुपैयाँ बराबरको आवेदन दिएका हुन् । यो मागको ८८.० प्रतिशत हो ।
कम्पनीले असोज १४ गतेदेखि आईपीओ बिक्री खुला गरेको हो । कम्पनीले सर्वसाधारणलाई ९७ लाख ३२ हजार ५ सय ४४ कित्ता शेयर निष्कासन गरेको हो । कम्पनीले प्रति कित्ता अंकित मूल्य १०० रुपैयाँमा प्रिमियम वापत १३७.२८ रुपैयाँ थप गरि प्रति कित्ता २३७.५८ रुपैयाँमा शेयर निष्कासन गरेको हो । आवेदन दिंदा न्युनतम १० कित्ता र अधिकतम १५ लाख कित्ताको आवेदन दिन सकिने छ ।
कम्पनीले यस अघि नै आयोजना प्रभावित दाङ र रोल्पा जिल्लाका स्थानीय र श्रम स्वीकृति लिई विदेशमा रहेका नेपाली नागरिकको लागि निष्कासन गरिएको शेयर बाँडफाँड गरिसकेको छ ।
वि.सं.२०८० असोज १७ बुधवार १२:४६ मा प्रकाशित
