हामी सबैकाे संसारन्यूज

काठमाडौं । गैरआवासीय नेपाली संघ (एनआरएनए)ले इजरायलको द्वन्द्वग्रस्त क्षेत्र सेदोत नेगेभको किवुज अलुमिनमा हमासको आक्रमणमा परी १० जना नेपाली विद्यार्थी मारिएको घटनाप्रति दुःख व्यक्त गरेको छ ।

संघले सोमबार एक विज्ञप्ति जारी गर्दै भनेको छ, ‘एनआरएनए इजरायलसहित, नेपाली दूताबास, कूटनीतिक नियोगले पुष्टि गरेअनुसार किवुज अलुमिनमा रहेका १७ जना विद्यार्थीमध्ये १० जनाको मृत्यु भएको हो । अन्य ४ जनाको स्थानीय अस्पतालमा उपचार भइरहेको छ भने एक जना बेपत्ता छन् । यस दुखद् घडीमा आक्रमणमा परी ज्यान गुमाएका नेपाली र नेपालस्थित उनीहरुका शोकाकुल परिवारप्रति हार्दिक समवेदना व्यक्त गर्दछौँ ।’

इजरायलमा विकसित पछिल्लो संकटपूर्ण अवस्थामा फसेका नेपालीको उद्धार तथा सुरक्षाका लागि संघ प्रतिबद्ध रहेको परराष्ट्र मन्त्रालयमार्फत संघले सहकार्यका लागि समन्वय भइरहेको समेत जनाएको छ ।

‘यसका साथै, इजरायलस्थित गैरआवासीय नेपाली संघको राष्ट्रिय समन्वय परिषद्, दूतावास, कूटनीतिक नियोग र अन्य नेपाली संघसंस्थाहरुसँग समन्वय गरी त्यहाँस्थित संकटमा परेका नेपालीहरुको उद्धारका लागि प्रयास भइरहेको छ ।’

गैरआवासीय नेपाली संघ इजरायलस्थित सबै नेपालीलाई सतर्क, सुरक्षित र संयमित रहन अनुरोध समेत गरेको छ ।

नेपालको सुदूरपश्चिम विश्वविद्यालयको कृषि संकायमा अध्ययतरत विद्यार्थीहरु गत भदौमा प्रयोगात्मक सिकाइ (इन्टर्नसीप) का लागि ‘अर्न एन्ड लर्न प्रोग्राम’का लागि सेदोत नेगेभमा पुगेका थिए ।