हामी सबैकाे संसारन्यूज

काठमाडौं । इलेक्ट्रिक चुरोट (भेप) भित्र राखेर ९ किलो सुन तस्करी गरेको आरोपमा पक्राउ परेका पूर्वसभामुख कृष्ण बहादुर महराका छोरा राहुल महरासहित चारजनाविरुद्ध मुद्दा दायर भएको छ ।

सीआइबीले राहुल महरासहित सर्लाही घर भइ काठमाडौं नार्गाजुन बस्ने लोकेन्द्र बहादुर पौडेल, काठमाडौं बौद्धका निमा गुरुङ र बेल्जियन नागरिक दावा छिरीङ शेर्पाविरुद्ध जिल्ला अदालतमा मुद्दा दायर गरेको थियो । यद्यपी निमा फरार रहेका छन् ।

सरकारी वकिलको कार्यालय काठमाडौंले महरासहित चारैजनालाई प्रतिवादी बनाउँदै बुधबार मुद्दा दर्ता गरेको हो । चारजनामा लोकेन्द बहादुर पौडेल सुन तस्करी प्रकरणका मुख्य नाइके दाहोजिन वाङका सवारी चालक हुन् ।

गतवर्ष पुष १० गते फ्लाइ दुवईबाट नेपाल आएका चिनियाँ नागरिक ली हाङसनले ७३ वटा बट्टामा रहेको ७३० वटा लुकाएर ल्याएको ८ करोड ५५ लाख बराबरको ९ किलो सुन बरामद भएको थियो । उक्त सुन भन्सार कार्यालयबाट बाहिरीएपछि घटना बाहिरीएको र सिआइबीले अनुसन्धान गरी उनीहरुमाथि मुद्दा चलाएको थियो ।

उक्त भेपमा लुकाएर ल्याइएको सुन छुटाउन कृष्ण बहादुर महरा र राहुल महरालगायतले भन्सार प्रमुखलाई नै फोन गरेर दबाब दिएको समाचार सार्वजनिक भएको थियो । यद्यपी कृष्ण बहादुर महराले त्यसमा सुन भएको थाहा नभएकोले आफुले फोन गरेर भेप रोकिनुको कारण सोधेको बताउँदै आएका छन् । उनले उक्त घटनामा राहुल महराको संलग्नताबारे आफुलााई कुनै जानकारी समेत नभएको बताउँदै आएका छन् ।